«Վագների» նախկին հրամանատարը փախել է Նորվեգիա և պատրաստ է ցուցմունք տալ նախկին ղեկավարության դեմ

«Վագներ» մասնավոր ռազմական կազմակերպության ղեկավար Եվգենի Պրիգոժինը հաստատել է, որ Անդրեյ Մեդվեդևը, որը փախել է Նորվեգիա, «Վագների» մարտիկ է, գրում է Euronews-ը։

Հունվարի 13-ին Նորվեգիայի ոստիկանությունը սահմանն ապօրինի հատելու համար ռուսաստանցու էր ձերբակալել։ Ավելի ուշ, Gulagu.net նախագծի շնորհիվ պարզվել է, որ նա եղել է «Վագների» 7-րդ գրոհային ջոկատի 4-րդ վաշտի նախկին հրամանատարը։ Նորվեգիայում նա քաղաքական ապաստան է խնդրել և պատրաստ է ցուցմունք տալ հնարավոր ռազմական հանցագործությունների մասին, որոնց ականատես է եղել ծառայության ընթացքում։

«Մենք ապաստան չենք տալիս ռազմական հանցագործներին։ Այդ պատճառով պարզ է, որ սա շատ կարևոր գնահատական է, և այս ամենը պետք է շատ ուշադիր վերլուծվի։ Նա պետք է ակնկալի, որ իրեն մանրակրկիտ կստուգեն»,- ասել է Անդրեյ Մեդվեդևի փաստաբան Բրինյուլֆ Ռիսնեսը։

Gulagu.net-ին տված հարցազրույցում Մեդվեդևը պատմել է, թե ինչպես է իրեն հաջողվել մագլցել Նիկել քաղաքի մոտ գտնվող փշալարերի վրայով և բարակ սառույցի վրայով անցնել Պազ գետն ու հայտնվել Նորվեգիայում։

Նախկին վագներականի խոսքով՝ ռուս սահմանապահները շներով հետապնդել են իրեն, նույնիսկ կրակել են իր ուղղությամբ։

2013 թվականից «Վագները» գործում է տարբեր երկրների տարածքում, իսկ 2014 թվականից Ուկրաինայում ակտիվ մասնակցություն է ունենում ռազմական գործողություններին։ Հաղորդվում է, որ անցյալ տարվա սեպտեմբերին «Վագների» խումբն ակտիվորեն ներգրավել է ռուս բանտարկյալներին Ուկրաինա ուղարկելու համար՝ պայմանագրի կնքումից հետո դատվածությունը վերացնելու պայմանով։

Տաթև Ֆռանգյան