16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Ադրբեջանի իշխանությունները Գերմանիայից արտաքսված ևս մեկ ընդդիմադիրի են ազատազրկման դատապարտել
Քաղաքականություն
17.01.2023 | 22:50
Ադրբեջանում ավարտվել է Գերմանիայից արտաքսված ևս մեկ ընդդիմադիր ակտիվիստի դատական գործը: Ադրբեջանական լրատվականների հաղորդմամբ՝ նախօրեին Բաքվի ծանր հանցագործությունների դատարանը վճիռ է կայացրել ընդդիմադիր «Ժողովրդական ճակատ» կուսակցության ակտիվիստ Ջաֆար Միրզոևի նկատմամբ, որը մեղադրվում է թմրամիջոցների ապօրինի շրջանառության մեջ։ Դատարանը նրան 6 տարի ժամկետով ազատազրկման է դատապարտել։
Ավելի վաղ դատախազը դատարանին խնդրել էր Միրզոևին դատապարտել 7,5 տարվա ազատազրկման։ Եզրափակիչ խոսքում փաստաբան Նեյմաթ Քերիմլին խնդրել է արդարացնել ընդդիմադիր ակտիվիստին՝ ասելով, որ Միրզոևը ձերբակալվել է անհիմն, իսկ դատավարության ընթացքում նրա մեղքը չի ապացուցվել։
Ինքը՝ Միրզոևը, նույնպես հերքել է մեղադրանքը՝ այն որակելով քաղաքական դրդապատճառներով։
Ջաֆար Միրզոևն այն ակտիվիստներից է, որոնք ձերբակալվել են անցյալ տարվա աշնանը՝ Գերմանիայից արտաքսվելուց հետո։ Բոլորին մեղադրանք է առաջադրվել թմրամիջոցների ապօրինի շրջանառության համար։ Այլ մեղադրանքներով ձերբակալվել են ևս երկու ակտիվիստներ։ Իրավապաշտպանները բոլորին քաղբանտարկյալ են ճանաչել։
Այս ձերբակալությունների իրական պատճառը Եվրոպայում քաղաքական էմիգրանտների մասնակցությունն էր Ադրբեջանում քաղբանտարկյալներին ազատ արձակելու պահանջով ցույցերին։
Միրզոևը Գերմանիայից արտաքսվել է 2021 թվականի նոյեմբերի 25-ին, իսկ հունվարի 27-ին Բաքվում ձերբակալվել է։
Ավելի վաղ Գերմանիայից Ադրբեջան վերադառնալուց հետո ձերբակալվել էին նաև ընդդիմադիր ակտիվիստներ Մութալիմ Օրուջովը, Մալիկ Ռզաևը, Փունխան Քերիմլին, Սամիր Աշուրովը և Զիյա Իբրահիմլին։
Էմմա Չոբանյան
