16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Բելառուսում սկսվել է Սվետլանա Տիխանովսկայայի գործով հեռակա դատավարությունը
Քաղաքականություն
17.01.2023 | 13:34
Հունվարի 17-ին Մինսկի քաղաքային դատարանում մեկնարկել է Բելառուսի ընդդիմության առաջնորդներից մեկի՝ Սվետլանա Տիխանովսկայայի գործով հեռակա դատավարությունը, որն իրեն երկրի նախագահ էր հայտարարել 2020 թվականի օգոստոսի վիճելի նախագահական ընտրություններից հետո, գրում է DW-ի ռուսական ծառայությունը։
Տիխանովսկայայի հետ միասին որպես մեղադրյալ դատարան են հրավիրվել ընդդիմադիրներ Պավել Լատուշկոն, Մարիա Մորոզը, Օլգա Կովալկովան և Սերգեյ Դիլևսկին։
Բոլոր ամբաստանյալները մեղադրվում են պետական իշխանությունը հակասահմանադրական ճանապարհով զավթելու դավադրության, ծայրահեղական խմբավորում ստեղծելու և նման կազմավորում ղեկավարելու, սահմանափակող միջոցների (պատժամիջոցների) հրապարակային կոչերի, ազգային անվտանգությանը վնաս պատճառելու, սոցիալական ատելություն և տարաձայնություններ հրահրելու և այլ գործողությունների համար։
Բացի այդ, գործով ամբաստանյալներին մեղադրանք է առաջադրվել ևս մի քանի հոդվածներով՝ տարբեր համակցություններով։ Այսպիսով, Տիխանովսկայային լրացուցիչ մեղադրում են պետությանը դավաճանելու, զանգվածային անկարգություններին մասնակցելու, շենքեր և շինություններ գրավելու և պահելու, Կենտրոնական ընտրական հանձնաժողովի աշխատանքը խոչընդոտելու մեջ։ Լատուշկոն մեղադրվում է պաշտոնական լիազորությունները գերազանցելու և կաշառք վերցնելու համար։
Սվետլանա Տիխանովսկայան իր դեմ հեռակա դատավարությունն անվանել է ֆարս և հաշվեհարդար Բելառուսի ղեկավար Ալեքսանդր Լուկաշենկոյի կողմից։
«Այս դատավարությունները ամենևին էլ դատավարություն չեն, շոու են, ֆարս, դրանք արդարության հետ կապ չունեն: Սա Լուկաշենկայի և նրա կամակատարների անձնական վրեժն է, բայց ոչ միայն իմ, այլ նաև այլ մարդկանց դեմ, ովքեր դեմ են նրան»,- ասել է Տիխանովսկայան հունվարի 16-ին Դավոսում Համաշխարհային տնտեսական ֆորումի շրջանակներում։
Տաթև Ֆռանգյան
