16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Ջո Բայդենի վարչակազմի ներկայացուցիչները Կիև են մեկնել
Քաղաքականություն
17.01.2023 | 12:54
ԱՄՆ պետքարտուղարի տեղակալ Վենդի Շերմանը, Ազգային անվտանգության խորհրդի խոսնակ Ջոն Ֆայները և Պենտագոնի ղեկավարի տեղակալ Քոլին Քալը մեկնել են Կիև՝ հանդիպելու Ուկրաինայի նախագահ Վլադիմիր Զելենսկիի, նախագահի աշխատակազմի և կառավարության ներկայացուցիչների հետ։ Այս մասին հայտնել են ԱՄՆ Պետքարտուղարությունից, գրում է VOA-ն։
Պետքարտուղարության խոսնակ Նեդ Փրայսը նշել է, որ Ջո Բայդենի վարչակազմի պաշտոնյաները պատրաստվում են վերահաստատել Ուկրաինային աջակցելու և երկիրը ռուսական ագրեսիայից պաշտպանելու՝ Միացյալ Նահանգների վճռականությունը։
Մինչ Կիև մեկնելն ամերիկյան պատվիրակությունն այցելել է Բեռլին և Վարշավա՝ դաշնակիցների հետ քննարկելու Ուկրաինայի անվտանգության համակարգման հարցը։
Կիևում Վենդի Շերմանը, Ջոն Ֆայները և Քոլին Քալն արդեն հանդիպել են վարչապետ Դենիս Շմիգալի հետ՝ քննարկելու, թե ինչպես ԱՄՆ-ի և միջազգային աջակցությունը կարող է օգնել կայունացնել ուկրաինական տնտեսությունը և խթանել ԱՄՆ-Ուկրաինա առևտուրն ու ներդրումները, ինչպես նաև համագործակցությունը երկրի վերականգնման համար։
Նրանք նաև հանդիպել են պաշտպանության նախարար Ալեքսեյ Ռեզնիկովի հետ՝ քննարկելու դիվանագիտական ջանքերն ու Ուկրաինայի անվտանգության կարողությունների ամրապնդմանն ուղղված օժանդակությունը:
Տաթև Ֆռանգյան
