Նոր պատերազմ է լինելու՝ փոքրիկ համաշխարհային․ ՀՀ-ն շահած դուրս գալու ռեալ շանս ունի․ Միքայել Հայրապետյան․ ՏԵՍԱՆՅՈՒԹ

Մեկ ամսից ավելի Ադրբեջանը փակ է պահում Լաչինի միջանցքը՝ բլոկադայի ենթարկելով Արցախը։ Միաժամանակ՝ ռուս խաղաղապահները չեն կատարում միջանցքը վերահսկողության տակ պահելու իրենց պարտականությունը՝ Բաքուն և Մոսկվան այսպիսով խախտում են նոյեմբերի 9-ի հայտարարության դրույթները։ Պարբերաբար ադրբեջանական հարձակումներ են տեղի ունենում ՀՀ-ի սուվերեն տարածքների վրա։ Ուկրաինական պատերազմում ՌԴ-ին զենք մատակարարելու մեղադրանքներով Արևմուտքի և Իրանի հարաբերություններն են լարվել։

Թուրքիան և Ադրբեջանն են վերջին շրջանում զորավարժություն անցկացրել Իրանի սահմանին։ Սպառնալիքներ են հնչեցվել դեպի Իրանը։ Նաև Թուրքիան նախապատրաստվում է նախագահական ընտրությունների, ուր Էրդողանն ունի վերընտրվելու խնդիր։

Ներքաղաքական մեծ լարվածություն կա այդ պետությունում՝ Էրդողանը չեզոքացնում է մրցակիցներին։ Եվ իհարկե, 11 ամիս Ուկրաինայի դեմ պատերազմ է վարում ՌԴ-ն՝ չկարողանալով հասնել ի սկզբանե դրած նպատակներին, որն է՝ Կիևի ապառազմականացումը և ամբողջական հպատակեցումը։ Անորոշությունները բավականին շատ են, զարգացումները՝ անհաշվելի։

Հանրային գործիչ Միքայել Հայրապետյանը Factor TV-ի հարցազրույցում կանխատեսում է ռեգիոնում նոր ռազմական գործողությունների սկսում․ «Իրոք, մենք պարտվել ենք պատերազմում, բայց այնպես չէ, որ հաջորդ պատերազմը սարերի հետևում է։ Միանգամայն նոր բնույթի պատերազմ է լինելու՝ փոքրիկ համաշխարհային պատերազմ, ինչպես ժամանակին բալկանյան պատերազմների մասին էին ասում։ Մենք պետք է կարողանանք տանուլ չտալ, և հակառակը՝ շահած դուրս գալու ռեալ շանսեր կան։ Տանուլ չենք տա, եթե պատրաստակամ լինենք, երբ մեր միջից թոթափենք պարտվածի սինդրոմը։

Հիշո՞ւմ եք՝ Նիկոլը մի բան ասաց պատերազմի օրերին, բայց քանի որ մակերեսով խորք չկար այնտեղ, չփորձեց շարունակել։ Դա շատ կարևոր թեզ էր, ասաց՝ ինչ էլ պատահի, մեզ պարտված չհամարենք։ Եվ ծաղրողներն էին սրիկա, և Նիկոլն էր բավականին գավառամիտ, որովհետև ասածը փայլատակեց և վերջացավ՝ տակը ոչ մի հիմք չդրեց»,- ասաց Միքայել Հայրապետյանը։

Հարցազրույցն ամբողջությամբ՝ տեսանյութում։

Ռոբերտ Անանյան