Ավիաաղետ Նեպալում. փրկարարները ողջ մնացածների գտնելու հույս այլևս չունեն

Նեպալցի փրկարարներն այլևս հույս չունեն գտնել կիրակի տեղի ունեցած ավիավթարից ողջ մնացածների: Այս ավիաաղետը երկրում զոհերի թվով վատագույնն էր վերջին տասնամյակների ընթացքում: Տեղական իշխանությունների ներկայացուցիչ Թեք Բահադուրն ասել է, որ ուղևորներից կամ անձնակազմի անդամներից որևէ մեկին ողջ գտնելու հավանականությունը զրոյական է։ Սակայն, ըստ նրա, հնարավոր է եղել գտնել կործանված ինքնաթիռի երկու «սև արկղերը», փոխանցում է BBC-ի ռուսական ծառայությունը։

Yeti Airlines-ի ներկայացուցիչ Անուպ Ջոշին ասել է, որ կործանված ինքնաթիռի օդաչուն օդանավակայանին մոտենալիս չի նշել տեխնիկական խնդիրների կամ դժվարությունների մասին։ Ջոշիի խոսքով՝ վթարի պահին թույլ քամի էր փչում, տեսանելիությունը լավ էր, իսկ սարերը շատ լավ տեսանելի էին։

Օդաչուն խնդրել է վայրէջք կատարել իրեն չհատկացված թռիչքուղու վրա, և օդանավակայանի հսկիչը համաձայնել է այս փոփոխությանը:

«Երկու թռիչքուղիներն էլ աշխատանքային վիճակում են եղել: Ինքնաթիռին թույլ են տրվել վայրէջք կատարել»,- ասել է Պոխարա օդանավակայանի ներկայացուցիչը:

Yeti Airlines ավիաընկերության ինքնաթիռում, որը կիրակի Կատմանդուից մեկնել է զբոսաշրջային Պոխարա քաղաք, եղել է 72 ուղևոր և օդանավի անձնակազմի անդամներ։

Դեռևս պարզ չէ, թե կոնկրետ ինչն է եղել վթարի պատճառը։

«Այս պահին մեզ հաջողվել է դուրս բերել 68 դի, ևս չորս մարդու որոնում ենք»,- ասել է Բահադուրը։

Մահացածների թվով սա Նեպալում վերջին 30 տարվա ընթացքում գրանցված ամենավատ ավիավթարն է։ Ըստ նախնական տեղեկությունների՝ 53 ուղևորները Նեպալի քաղաքացիներ են եղել։ Բացի նրանցից, ինքնաթիռում եղել է 5 հնդիկ, 4 ռուս, 2 կորեացի և Իռլանդիայի, Ավստրալիայի, Արգենտինայի և Ֆրանսիայի մեկական քաղաքացի։

Տաթև Ֆռանգյան