16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Բաքուն դժգոհ է միջազգային լրատվամիջոցների կողմից Լաչինի միջանցքի արգելափակման խնդրի լուսաբանումից
Քաղաքականություն
16.01.2023 | 18:06
Համաշխարհային տարբեր հայտնի լրատվամիջոցների կողմից Լաչինի միջանցքի արգելափակման խնդրի լուսաբանումն այնքան էլ պաշտոնական Բաքվի սրտով չեն։ Մասնավորապես, իշխանությունների կողմից ղեկավարվող Ադրբեջանի մամուլի խորհուրդն այս առնչությամբ հայտարարություն է տարածել՝ իր դժգոհությունները հայտնելով։
Մամուլի խորհրդին դուր չի գալիս հատկապես այն, որ Արցախում իրավիճակը ներկայացնելիս՝ ԶԼՄ-ներն օգտագործում են «հումանիտար ճգնաժամ, հայ ժողովրդի ցեղասպանություն, էթնիկ զտում, 120,000 հայերի շրջափակում» և այլ արտահայտություններ։
«Ցավալի է, որ գիտակցաբար կամ անգիտակցաբար մանիպուլյացիա են թույլ տալիս այն լրատվամիջոցները, որոնք ազդում են աշխարհում և Եվրոպայում հասարակական կարծիքի ձևավորման վրա, առաջնորդվում են կարծիքների բազմակարծությամբ և հայտարարում, որ իրենց գործունեությունը հիմնված է մարդկային արժեքներին ծառայելու նպատակի վրա։ Նրանց հոդվածները գրեթե կրկնում են միմյանց։ Նույն բովանդակությունը, նույն կանխորոշված պնդումները, նույնիսկ, որոշ դեպքերում, նույն նախադասությունները։ Թեև օբյեկտիվ լրատվամիջոցները պետք է պարզաբանեն Ռուբեն Վարդանյանի անձը, նրա բոլոր խոշոր դրամային խարդախությունները, քրեական աշխարհին մոտ լինելը, ուշադրության արժանացնեն նրա անօրինական գործունեությունը»,- ասվում է հայտարարության մեջ՝ համաշխահային առաջատար ԶԼՄ-ներին կոչ անելով «օբյեկտիվ գնահատական տալ ճանապարհի փակման ակցիային, հաշվի առնել իրական փաստերը և չլինել միակողմանի ու կողմնակալ քարոզչության գործիք»։
Հավելենք, որ մեկ ամիս ավելի է, ինչ Ադրբեջանի իշխանությունները փակ են պահում Լաչինի միջանցքը՝ խորացնելով հումանիտար ճգնաժամն Արցախում։
Էմմա Չոբանյան
