08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Գարնանը Իրանը Ռուսաստանից Սու-35 կործանիչներ կստանա. Tasnim
Քաղաքականություն
16.01.2023 | 16:13
Մարտին Թեհրանը Ռուսաստանից մի քանի Սու-35 կործանիչներ կստանա։ Այս մասին կիրակի օրը՝ հունվարի 15-ին, հայտնել է իրանական Tasnim գործակալությունը։ Իրանի Մեջլիսի Ազգային անվտանգության և արտաքին քաղաքականության հանձնաժողովի անդամ Շահրիյար Հեյդարին ասել է․ «Մենք Ռուսաստանին պատվերներ ենք ուղարկել պաշտպանական համակարգերի, հրթիռների և ուղղաթիռների համար, և այդ զինատեսակների մեծ մասը շուտով կմտնի երկիր»։
Իրանի ռազմաօդային ուժերի հրամանատար Համիդ Վահեդին էլ դեռ 2022-ի սեպտեմբերին նշել էր, որ օրակարգում է Մոսկվայից Սու-35-ի գնումը, իսկ դեկտեմբերի վերջին իսրայելական i24news հեռուստաալիքը, հղում անելով Մոսկվայի և Թեհրանի միջև ռազմական գործարքներին հետևող հետախուզական աղբյուրներին, հայտնել էր, որ Ռուսաստանը շուտով Իրանին կմատակարարի կործանիչների էսկադրիլիա:
Խոսքն, ըստ ամենայնի, 24 միավոր Սու-35 կործանիչների մասին է, որոնք ի սկզբանե նախատեսված են եղել Եգիպտոսի համար, հաղորդում է հեռուստաալիքը։ Հետախուզության տվյալներով՝ իրանցի օդաչուներն արդեն վերապատրաստվել են և պատրաստ են շահագործել այդ ինքնաթիռները։ Բացի այդ, Թեհրանը պետք է Մոսկվայից ստանա հակաօդային պաշտպանության համակարգեր, նշել է հեռուստաալիքը։
Ըստ աղբյուրի՝ Իրանն իր հերթին պետք է Ռուսաստան ուղարկեր «Շահեդ-136» կամիկաձե անօդաչուների ևս մեկ խմբաքանակ՝ ի հավելումն արդեն առաքված 1700 անօդաչուների։ Թեև Մոսկվան հերքում է Ուկրաինային հարվածելու համար իրանական զենքի օգտագործումը, Թեհրանը հաստատել էր, որ անօդաչու թռչող սարքեր է ուղարկել Ռուսաստան,պնդելով՝ որ խոսքը փոքր խմբաքանակի մասին է՝ Ուկրաինա ներխուժումից առաջ։
Իսրայելի հետախուզության տնօրեն Մոսադ Դեյվիդ Բարնեան ավելի վաղ հայտարարել էր, որ Իրանը ծրագրում է մեծացնել Ռուսաստան ժամանակակից սպառազինությունների մատակարարումը։
2022 թվականի դեկտեմբերին ամերիկյան NBC հեռուստաալիքը, հղում անելով Սպիտակ տան աղբյուրներին, հայտնել էր, որ Ռուսաստանը «աննախադեպ մակարդակի» ռազմական և տեխնիկական աջակցություն է ցուցաբերում Իրանին՝ Թեհրանի կողմից Ուկրաինայի պատերազմի համար զենք մատակարարելու դիմաց։
Տաթև Ֆռանգյան
