Հանձնեք «ահաբեկիչներին»․ Էրդողանը խոսել է ՆԱՏՕ-ին Շվեդիայի անդամակցության՝ Անկարայի պայմաններից

Թուրքիայի նախագահ Ռեջեփ Թայիփ Էրդողանը կրկին Շվեդիային ու մի շարք եվրոպական երկրների քննադատել է, իբր, իրենց տարածքում, իբր, ահաբեկչական կազմակերպությունների անդամների շարունակական ներկայությունը հանդուրժելու համար, գրում է Անադոլու գործակալությունը։

Նա նշել է, որ «ահաբեկիչների» արտահանձնումը պարտադիր է Անկարայի կողմից Շվեդիայի և Ֆինլանդիայի՝ ՆԱՏՕ-ին անդամակցությանն աջակցելու համար։

«Մենք նրանց ասել ենք՝ եթե չհանձնեք ահաբեկիչներին, որոնք գտնվում են ձեր երկրներում, մենք չենք կարող վավերացնել ՆԱՏՕ-ին անդամակցության ձեր հայտերը մեր խորհրդարանում։ Նրանք պետք է արտահանձնեն մոտ 130 ահաբեկչի, որ նրանց առաջարկներն անցնեն մեր խորհրդարանով։ Սակայն, ցավոք, դեռ չեն արել դա»,- ասել է Էրդողանը Մուղլայում երիտասարդների հետ հանդիպմանը։

Նա նշել է, որ Ստոկհոլմի փողոցներում պարբերաբար Քուրդիստանի աշխատավորական կուսակցության (PKK) կողմնակիցների ցույցեր են անցկացվում։ Թուրքիայի նախագահն ընդգծել է, որ Անկարան բազմիցս զգուշացրել է Շվեդիայի իշխանություններին դրանց անթույլատրելիության մասին։

«Չնայած մեր նախազգուշացումներին, ցավոք, ոչ մի քայլ չի ձեռնարկվել PKK/PYD-ի ցույցերը դադարեցնելու համար։ Եթե նրանք այդ իրավիճակի հետ կապված միջոցներ չձեռնարկեն, դա կարող է հանգեցնել Շվեդիայի հետ մեր հարաբերություններում լարվածության հետագա աճին»,- ասել է Էրդողանը։

Թուրքիայի նախագահի խոսքով՝ իր երկրի ազգային անվտանգությանը սպառնացող «ահաբեկչական խմբավորումներ» առկա են ոչ միայն Շվեդիայում և Ֆինլանդիայում, այլ նաև այնպիսի երկրներում, ինչպիսիք են Գերմանիան, Ֆրանսիան ու Մեծ Բրիտանիան, և Անկարան որոշելու է իր դիրքորոշումը նրանց նկատմամբ։

Հիշեցնենք, որ օրերս Սոտկհոլմում ցույցի ժամանակ ակցիայի մասնակիցները գլխիվայր կախել էին Էրդողանի խամաճիկը։ Սա մեծ դժգոհություն է առաջացրել Անկարայում։ Դեպքի առթիվ Թուրքիայում Շվեդիայի դեսպանն ԱԳՆ է կանչվել։

Էմմա Չոբանյան