«Ռուսնե՛ր, դուրս մեր երկրից, Նիկոլ, դու ևս հեռացի՛ր»․ ԱԺԲ-ի ցուցարարները շրջեցին Գյումրիում

Ազգային-Ժողովրդավարական բևեռի ներկայացուցիչներն այսօր Գյումրիի 102-րդ ռազմաբազայի դիմաց պահանջեցին բացել Բերձորի 34 օր շարունակ փակված միջանցքը. նրանք հայտարարեցին, որ ռուսական ռազմական ներկայությունն արդեն իսկ սպառնալիք է Հայաստանի համար, քննադատեցին նաև ՀՀ իշխանություններին՝ Նիկոլ Փաշինյանին մեղադրելով թուրքական օրակարգին ծառայելու, Արցախը հանձնելու ու Հայաստանը մասնատելու մեջ։

Ցուցարարները ՌԴ-ից պահանջեցին հեռանալ տարածաշրջանից ու ՀՀ-ից, պահանջեցին նաև Նիկոլ Փաշինյանի հրաժարականը։

Ժիրայր Սեֆիլյանն իր ելույթում քննադատեց թե՛ պաշտոնական Երևանի և թե՛ Ստեփանակերտի քաղաքականությունը՝ ասելով․ «Թե Փաշինյանը քանի տոկոս Թուրքիային է ծառայում, Ստեփանակերտը քանի տոկոս Ռուսաստանին է ծառայում, դա արդեն հարափոփոխ է այս օրերին, բայց իմ անձնական կարծիքով՝ Փաշինյանի վերջին հարցազրույցը լսելուց հետո կարող եմ ասել, որ Երևանի քաղաքականության մեջ արդեն գերակշռում է թուրքական քաղաքականություն։ Այսօր Նիկոլը, Ալիևի, Էրդողանի ձեռքից բռնած, Արցախի հանձնման, Հայաստանը կտրտելու, մասնատելու ընթացքի մեջ է, այս իրականությունը կարող է կանգնեցնել միայն մեր ժողովուրդը»։

Հայերենից բացի, ելույթներ հնչեցին նաև ռուսերենով և անգլերենով։

102-րդ ռազմաբազայի 2-րդ մուտքի դիմաց ցույց անցկացնելուց հետո ակցիայի մասնակիցները ցուցապաստառներով, կոչերով շրջեցին Գյումրիի տարբեր փողոցներով ՝ ռուսներից պահանջելով բացել Բերձորի միջանցքը, հեռանալ տարածաշրջանից։

Արմիկ Մովսիսյան