11.04.2026 | 22:24
Այցելել եմ երեկվա ողբերգական վթարից տուժած փոքրիկներին․ Ավանեսյան
ԱՄՆ-ն ու Ճապոնիան միավորում են ուժերը` ընդդեմ Չինաստանի սպառնալիքի
Քաղաքականություն
15.01.2023 | 12:48
Միացյալ Նահանգները հայտարարել է Ճապոնիայի Օկինավայի ամերիկյան ռազմական բազայում ավելի շարժունակ ծովային ստորաբաժանումներ ստեղծելու ծրագրերի մասին: Նպատակն է պաշտպանել իր դաշնակցին՝ Ճապոնիային և ամբողջ Հնդկ-Խաղաղօվկիանոսյան տարածաշրջանը Չինաստանի սպառնալիքներից, գրում է Ամերիկայի ձայնը:
Չինաստանի կողմից աճող սպառնալիքները ստիպում են Միացյալ Նահանգներին և Ճապոնիային ընդլայնել և խորացնել միմյանց միջեւ ռազմական և դիվանագիտական համագործակցությունը:
Հինգշաբթի օրը Սպիտակ տան Ազգային անվտանգության խորհրդի համակարգող Ջոն Քիրբին ասել է, որ նախագահ Ջո Բայդենը Սպիտակ տանն այդ նպատակով հանդիպելու է վարչապետ Ֆումիո Կիսիդային:
Չորեքշաբթի օրը պետքարտուղար Էնթոնի Բլինքենն էր Պետդեպարտամենտում ողջունել Ճապոնիայի արտաքին գործերի և պաշտպանության նախարարներին: «Այն, ինչ հիմա մենք միասին անում ենք, դաշինքի խորացումն է, որի նպատակը Հնդկ-Խաղաղօվկիանոսյան տարածաշրջանում և դրանից դուրս առաջացող մարտահրավերները դիմակայելն է», ասել է նա:
Հարցին, թե արդյոք անխուսափելի է Չինաստանի կողմից Թայվանի դեմ ներխուժումը, ԱՄՆ-ի պաշտպանության նախարար Լլոյդ Օսթինը ասել է, որ Չինաստանի կողմից սադրիչ ռազմական վարքագիծը շատ տեսանելի է: «Մենք կարծում ենք, որ նրանք ձգտում են հաստատել «նոր կարգեր»: Սակայն, թե արդյոք դա նշանակում է մոտալուտ ներխուժում, մեծապես կասկածում եմ»,- ասել է նա:
ԱՄՆ-ի և Ճապոնիայի միջեւ ավելի խորը համագործակցության մասին լուրերին Չինաստանի արտգործանախարարության խոսնակն արձագանքել է հետեւյալ խոսքերով` ԱՄՆ-ը և Ճապոնիան պետք է միմյանց միջեւ համագործակցության խորացումն իրականացնեն այնպես, որպեսզի այն չվնասի երրորդ կողմի շահերին կամ տարածաշրջանային խաղաղությանն ու կայունությանը:
Բլինքենը և Օսթինը մեծապես ողջունել են Երկրորդ աշխարհամարտից ի վեր Ճապոնիայում զինված ուժերը եւ հատկապես հակառակորդի բազաներին հակահարվածներ հասցնելու կարողությունները հզորացնելու ամենալայնավածալ աշխատանքները:
Չափազանց հստակ ձեւակերպված հայտարարությամբ ԱՄՆ-ի և Ճապոնիայի բարձրաստիճան պաշտոնյաներն ասում են, որ Չինաստանն իրենց առջեւ ամենամեծ ռազմավարական մարտահրավերն է, որն աննախադեպ սպառնալիք է դառնում ընդդեմ միջազգային կարգերի:
