Էրդողանն ամեն կերպ փորձում է ազատվել ընտրություններում հիմնական մրցակցից․ Ստամբուլի քաղաքապետին նոր մեղադրանք է առաջադրվել

Թուրքիայի իշխանությունները դատական հայց են ներկայացրել ընտրություններում գործող նախագահ Ռեջեփ Թայիփ Էրդողանի հավանական հիմնական մրցակցի՝ Ստամբուլի քաղաքապետ Էքրեմ Իմամօղլուի դեմ՝ նրան մեղադրելով «հանրային մրցույթ կեղծելու» համար, երբ նա եղել է քաղաքի Բեյլիքդուզյու շրջանի ղեկավարը, գրում են թուրքական լրատվամիջոցները։

Այս մեղադրանքը նախատեսում է մինչև 7 տարի ժամկետով ազատազրկում։ Դատական նիստն էլ նշանակված է հունիսի 15-ին։

Գործը բացվել է Ներքին գործերի նախարարության հետաքննությունից հետո՝ կապված հավաքագրման ծառայությունների մրցույթի հետ, որն անցկացվել է 2015 թվականին։ Իմամօղլուն հայցն անվանել է «կեղծ քրեական հանցագործություն սարքելու փորձ»՝ նշելով, որ մրցութային գործընթացն այն ժամանակ հետաքննվել է առանց ապօրինությունների բացահայտումների։

«Ես նույնիսկ իմ ստորագրությունը չունեմ այդ փաստաթղթերի տակ։ Բացի այդ, ՆԳՆ-ն և Պետական խորհուրդը իրենց փորձաքննությունների ժամանակ որևէ խնդրահարույց բան չէին հայտնաբերել»,- գրել է Իմամօղլուն թվիթերյան իր էջում։

Հիշեցնենք, որ դեկտեմբերի 14-ին թուրքական դատարանն Իմամօղլուն դատապարտել էր 2 տարի 7 ամիս ազատազրկման՝ Թուրքիայի Բարձրագույն ընտրական հանձնաժողովի 11 անդամներին, իբր, «վիրավորելու» մեղադրանքով, երբ նա քննադատել էր տեղական ինքնակառավարման մարմինների ընտրությունների առաջին փուլը չեղարկելու որոշումը։ Դատարանը նաև քաղաքական գործունեության արգելք է սահմանել Իմամօղլուի նկատմամբ, որը պետք է հաստատի վերաքննիչ դատարանը։ Իմամօղլուն արդեն բողոքարկել է այդ վճիռը։

Էքրեմ Իմամօղլուն Էրդողանի և ԱԶԿ-ի կողմից հաճախակի թիրախ դարձած գործիչներից է՝ 2019 թվականի Ստամբուլի ընտրություններում նրա վճռական հաղթանակից ի վեր: ԱԶԿ-ն ընդդիմադիր գործչին կեղծ մեղադրանքներով հետաքննության է ենթարկում:

Ստամբուլի քաղաքապետը Էրդողանի գլխավոր մրցակիցներից է նաև նախագահական ընտրություններում՝ ըստ փորձագետների։ Տարբեր հարցումների տվյալներով՝ Իմամօղլուն գերազանցում է Էրդողանին։

Էմմա Չոբանյան