26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Իսրայելն ու Ադրբեջանը ամրապնդում են հարաբերությունները. երկու երկրների ԱԳ նախարարները հեռախոսազրույց են ունեցել
Քաղաքականություն
13.01.2023 | 21:29
Իսրայելի ԱԳՆ ղեկավար Էլի Կոենն Ադրբեջանի արտգործնախարար Ջեյհուն Բայրամովին հրավիրել է այցելել Իսրայել։ Այցի հրավերը նա արել է Բայրամովի հետ հեռախոսազրույցում։
«Մենք ամրապնդում ենք կապերն Ադրբեջանի հետ: Այսօր ես հեռախոսազրույց եմ ունեցել Ադրբեջանի արտաքին գործերի նախարար Ջեյհուն Բայրամովի հետ, որը շնորհավորել է ինձ նշանակման կապակցությամբ։ Իսրայելում Ադրբեջանի դեսպանատան բացման կապակցությամբ նախարարին հրավիրել եմ այցելել մեր երկիր։ Մենք պայմանավորվեցինք ամրապնդել հարաբերությունները և ընդլայնել համագործակցությունը մեր երկրների միջև»,- գրել է Կոենը թվիթերյան իր էջում։
Հավելենք, որ Ադրբեջանն արդեն նշանակել է Իսրայելում իր առաջին դեսպանին։ Այդ պաշտոնը վստահվել է Մուխտար Մամեդովին։
Հիշեցնենք, որ նոյեմբերին Ադրբեջանի Միլի Մեջլիսն Իսրայելում դեսպանատուն բացելու որոշում էր ընդունել, որը մեծ ոգևորությամբ է ընդունվել Իսրայելի իշխանությունների շրջանում։ Ադրբեջանի ԱԳ փոխնախարար Ֆարիզ Ռզաևն էլ դեկտեմբերին պաշտոնական այցով Իսրայելում էր՝ վերահսկելու Թել Ավիվում Ադրբեջանի դեսպանատան բացման նախապատրաստական աշխատանքները։
Էմմա Չոբանյան
