Վրաստանն ունի Ադրբեջանի և Թուրքիայի հետ ռազմավարական գործակցություն, բայց ՀՀ-ի հետ ձևավորում է կարևոր օրակարգ․ Ջոնի Մելիքյան․ ՏԵՍԱՆՅՈՒԹ

Հայաստան էր ժամանել Վրաստանի վարչապետ Իրակլի Ղարիբաշվիլին։ Այցի գլխավոր արդյունքներից է՝ Հայաստանի և Վրաստանի քաղաքացիները երկու երկրներ կկարողանան այցելել նաև ID քարտերով։ Միաժամանակ, Հայաստանում երբեմն փորձ է արվում Վրաստանը ներկայացնել իբրև ադրբեջանամետ կամ թուրքամետ պետություն։ Հատկապես շեշտում են Վրաստանի հետ տնտեսական ծրագրերը, թուրք-ադրբեջանական ներդրումները՝ տուրիզմի, էներգետիկայի ոլորտներում։ Երբեմն ասում են՝ Վրաստանը կախյալ է այդ պետություններից։ Եվ օրինակ՝ 44-օրյայի ժամանակ Վրաստանը խոչընդոտել է ՀՀ ռազմական բեռների տեղափոխումը։

Factor TV-ին տված հարցազրույցում «Օրբելի» կենտրոնի վերլուծաբան, Վրաստանի հարցերով փորձագետ Ջոնի Մելիքյանին հարց ուղղեցինք՝ ո՞րն է ճշմարիտը, որը՝ կեղծիքը։

«Շատ կարևոր է, որ խուսափենք սև-սպիտակ մոտեցումներից։ Խնդիրներ եղել են, բայց դրանք օբյեկտիվ պատճառներ ունեին։ Վրաստանի ԱԽ-ն պաշտոնապես հայտարարություն էր տարածել, որ Հայաստանի և Ադրբեջանի համար փակել է ցամաքը և օդը։ Իրենք լուրջ համայնքներ ունեն հայկական և ադրբեջանական, և զգուշանում են, որ այս կոնֆլիկտը ներթափանցի իրենց տարածք։ Այլ երկրներ, որոնք շահագրգիռ չեն հայ-վրացական հարաբերությունների զարգացմամբ՝ ստեղծում են արհեստական խնդիրներ, մասնավոր խնդիրների շուրջ միֆեր են ստեղծում»,- ասաց նա։

Իրակլի Ղարիբաշվիլին Նիկոլ Փաշինյանի հետ հանդիպմանն ասել է, որ Վրաստանն ունի նախաձեռնություն՝ խաղաղ հարևանության հարթակի ձևավորման համար․ «Տվյալ ձևաչափը չի փոխարինի այլ ձևաչափերի և այլ նախաձեռնությունների, հակառակը՝ դա կօգնի, է՛լ ավելի կհզորացնի հնարավորությունները, որ տարածաշրջանում երկարաժամկետ խաղաղություն և կայունություն հաստատվի»։

Վրաստանի վարչապետն ասել է, որ պատրաստ են միջնորդի դեր խաղալ Ադրբեջանի և ՀՀ-ի միջև։

Ջոնի Մելիքյանն ասում է, որ Վրաստանն ունի Ադրբեջանի և Թուրքիայի հետ ռազմավարական գործակցություն, բայց ՀՀ-ի հետ ևս սկսել է կարևոր օրակարգ ձևավորել։ Երկար դադարից հետո կայացավ հայ-վրացական տնտեսական հարցերով միջկառավարական խորհրդի նիստը, առևտրի ծավալն անցավ մեկ միլիարդ դոլարը, ինչպես նաև ՀՀ-ն և Վրաստանն ունեն հեռանկարային ծրագիր՝ Հյուսիս-հարավ միջանցքի շրջանակում, որով կկապվեն Պարսից ծոցը Սև ծովին։ Հայաստանը խնդիր ունի արագացնել իր ճանապարհների, ենթակառուցվածքների կառուցումը և ապահովել անվտանգություն։

Հարցազրույցն ամբողջությամբ՝ տեսանյութում։

Ռոբերտ Անանյան