Ակնկալել, որ բարեփոխումներ կարող են լինել, միամտություն է․ Արթուր Սաքունց․ ՏԵՍԱՆՅՈՒԹ

«ՆԳ նախարարությունը միավորում է երեք տարբեր կառույցներ։ Տրամաբանությունը հուշում է, որ առնվազն չպետք է այս ծառայություններից որևէ մեկին տրվեր առավելություն»,- «Ի՞նչ կփոխվի ոստիկանության բարեփոխումներում, եթե ՆԳ նախարարը նախկին ոստիկանապետն է» թեմայով հրավիրված քննարկման ժամանակ այսպիսի կարծիք հայտնեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ անդրադառնալով ՆԳ նախարարի պաշտոնում նախկին ոստիկանապետ Վահե Ղազարյանի նշանակմանը։

Սաքունցի դիտարկմամբ՝ ՆԳ նախարար պետք է նշանակվեր մի մարդ, որը փորձառության, պրակտիկայի և կենսագրության առումով կապակցված չլիներ որևէ կառույցի հետ։

«ՆԳ նախարարը քաղաքական պաշտոն է։ Վարչապետը քաղաքական պաշտոնի նշանակում է ոստիկանապետին։ Ի՞նչ է դա նշանակում․․․ Ոստիկանությունը չպետք է քաղաքականացված լինի, այդ դեպքում ո՞նց ես ոչ քաղաքական գործչին քաղաքական պաշտոնի նշանակում, մյուս կողմից էլ՝ քաղաքականացված ոստիկանը շատ ավելի վատ է։ Սա լուրջ հակազդեցություն է առաջացնում»։

Սաքունցի գնահատմամբ՝ ՆԳ նախարարը պետք է հանդես գա որպես քաղաքականության մշակող , մինչդեռ նախկին ոստիկանապետ Վահե Ղազարյանը չունի քաղաքականություն մշակելու կարողություն։
«Իսկ ՀՀ վարչապետի նշանակման տրամաբանությունն այն է, որ կառավարելիության խնդիրն ավելի է կարևորվում, քան բարեփոխում իրականացնելը․․․ Մնալ այդ ձևաչափում և ակնկալել, որ բարեփոխումները կիրականանան, ուղղակի միամտություն է․․․ Բարեփոխումները դառնալու են ուղղակի թղթի վրա ձևակերպում»,-ընդգծեց Սաքունցը։

Մանրամասները՝ տեսանյութում։