Լաբորատորիա չենք կարող ունենալ, դա թանկ հաճույք է․ Կարեն Գիլոյան․ ՏԵՍԱՆՅՈՒԹ

Հստակեցվում են «դոպինգ» հասկացությունը և հակադոպինգային գործունեությունը, սահմանվում են Հայաստանում ազգային հակադոպինգային կազմակերպության նշանակությունն ու նրա լիազորությունները:  

ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի՝ հունվարի 13-ի նիստում ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանը առաջին ընթերցմամբ քննարկման ներկայացրեց իր  հեղինակած ««Ֆիզիկական կուլտուրայի և սպորտի մասին» օրենքում փոփոխություններ և լրացումներ կատարելու մասին» օրենքի նախագիծը: 

Ըստ հիմնավորման՝ օրենքում փոփոխություններ և լրացումներ կատարելու նախաձեռնությունը պայմանավորված է միջազգային իրավունքի սկզբունքների և նորմերի կիրառման անհրաժեշտությամբ, ինչպես նաև ոլորտին ներկայացվող արդի պահանջներին համապատասխանելու հրամայականով: Նման փոփոխություններ նախաձեռնելու պահանջով Հայաստանի «Հակադոպինգային գործակալություն» ՊՈԱԿ-ին դիմել էր նաև Համաշխարհային հակադոպինգային գործակալությունը: 

ԿԳՄՍ փոխնախարար Կարեն Գիլոյանը ներկայացրեց Կառավարության դրական կարծիքը նախագծի վերաբերյալ: 

«Հայաստան» խմբակցության պատգամավոր Լիլիթ Գալստյանը մտահոգություն արտահայտեց՝ նշելով․ «Եթե չունենք լաբորատորիա, արդյո՞ք դա կասկածի տակ չի դնում տեղական կառույցի գործունեությունը․ հնարավոր է հակասություններ առաջանան հայաստանյան կառույցի և միջազգային կառույցների դիտարկումներում և ունենանք ոչ ցանկալի արդյունքներ»։ 

«Լաբորատորիա չենք կարող ունենալ, դա թանկ հաճույք է․ տասնյակ միլիոնավոր ծախսեր են պետք»,-ասաց Կարեն Գիլոյանը՝ վստահեցնելով, որ աշխարհում լիցենզավորված մի քանի լաբորատորիաներ կան, այնտեղ մարդկային գործոն չի կարող լինել, նրանց պատասխանները սխալ չեն կարող լինել։

Նախագիծը ստացավ հանձնաժողովի դրական եզրակացությունը: 

 Մանրամասները՝ տեսանյութում։