ԱՄՆ-ը մտադիր է վերջ դնել ռուսական «Վագներ» ռազմական խմբավորման գործունեությանը

Ռուսական մասնավոր «Վագներ» ռազմական խմբի գործունեությունը և դրա հնարավոր փորձերը՝ զինվորների հավաքագրելու Սերբիայում ու աշխարհի այլ երկրներում, ԱՄՆ իշխանությունների մոտ լուրջ մտահոգություններ են առաջացնում։ Այս մասին Բելգրադ կատարած այցի ժամանակ հայտարարել է ԱՄՆ Պետքարտուղարության խորհրդական Դերեք Շոլլեն, գրում է DW-ի ռուսական ծառայությունը։

«Մենք տեսնում ենք, որ «Վագներ» խմբավորումը փորձում է զինվորներi հավաքագրել Սերբիայից և այլ երկրներից, և սա մի բան է, որը մենք չենք պատրաստվում հանդուրժել։ Ես չգիտեմ՝ Սերբիայում կա՞ն մտահոգություներ, բայց մենք խոսել ենք մեր մտահոգությունների մասին, և հուսով ենք կառավարության հետ համագործակցության այստեղ՝ Բելգրադում, և այլ տեղերում, որտեղ առկա է այդ խումբը՝ դրա գործունեությանը վերջ դնելու համար»,- ասել է Շոլլեն լրագրողներին Սերբիայի նախագահ Ալեքսանդր Վուչիչի հետ հանդիպումից հետո։

«Վագներ»-ի մարտիկներն ակտիվ մասնակցում են Ուկրաինայում ռազմական գործողություններին՝ պաշտոնապես չենթարկվելով ՌԴ ՊՆ-ին։ Շատ կամավորների խմբավորումը հավաքագրում է ռուսական բանտերում՝ նրանց խոստանալով համաներում վեցամսյա ծառայությունից հետո։ ՌԴ-ում, ի դեպ, պաշտոնապես վարձկանությունն արգելված է և հետապնդվում է Քրեական օրենսգրքի 359 հոդվածով։

Շոլլեն նաև կոչ է արել Սերբիային՝ միանալ Ռուսաստանի դեմ արևմտյան պատժամիջոցներին Ուկրաինա ներխուժման պատճառով:

«Ռուսաստանն ամեն օր դաժան, չարդարացված պատերազմ է վարում Ուկրաինայի դեմ, մենք պետք է համախմբվենք՝ ապահովելու համար, որ այդ վարքագիծն անընդունելի լինի»,- ասել է նա։

Նշենք, որ Սերբիան մնում է միակ եվրոպական երկիրը, որը հրաժարվել է ՌԴ-ի դեմ պատժամիջոցներ սահմանել։

Էմմա Չոբանյան