13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Ստոկհոլմում ցույցի ժամանակ Էրդողանի խամաճիկն են կախել․ Շվեդիայի դեսպանին կանչել են Թուրքիայի ԱԳՆ
Քաղաքականություն
13.01.2023 | 12:41
Շվեդիայի դեսպանը կանչվել է Թուրքիայի ԱԳՆ Ստոկհոլմում տեղի ունեցած ցույցի պատճառով, որի ժամանակ ակցիայի մասնակիցները Ռեջեփ Թայիփ Էրդողանի խամաճիկն են կախել ոտքերից։ «Շեշտվել է մեր ակնկալիքը, որ միջադեպի մեղավորները պետք է բացահայտվեն, անհրաժեշտ գործընթացներ իրականացվեն և Շվեդիան կատարի իր խոստումները», – թուրքական լրատվամիջոցներին ասել է դիվանագիտական աղբյուրը։ Դեսպանն նաև ԱԳՆ էր կանչվել հոկտեմբերին Շվեդիայի հանրային հեռուստատեսությամբ Էրդողանի հասցեին հնչած «վիրավորական բովանդակության» համար։
Հունվարի 12-ին թուրքական կառավարամետ լրատվամիջոցների տարածված կադրերից պարզ է դառնում, որ ակցիան նախաձեռնել են Քրդական աշխատավորական կուսակցության՝ PKK-ի անդամները։ Շվեդիայի արտաքին գործերի նախարար Թոբիաս Բիլստրոմն ասել է, որ Ստոկհոլմը դատապարտում է միջադեպը։ «Կառավարությունը պաշտպանում է քաղաքական ընտրությունների շուրջ բաց բանավեճը, սակայն խստորեն հորդորում է զերծ մնալ քաղաքական գործիչների դեմ ուղղված սպառնալիքներից և ատելությունից։ Ժողովրդի կողմից ընտրված նախագահին քաղաքապետարանի մոտ «մահապատժի ենթարկելը» զզվելի է»,-գրել է նա թվիթերյան իր էջում։
Շվեդիայի վարչապետն էլ հայտարարել է, որ Ստոկհոլմը վստահ է, որ Թուրքիան կհաստատի ՆԱՏՕ-ին անդամակցելու իր հայտը, սակայն իրենք պատրաստ չեն կատարել Անկարայի առաջադրած բոլոր պայմանները: Հիշեցնենք՝ Թուրքիան առայժմ չի վավերացել Շվեդիայի ու Ֆինլանդիայի՝ ՆԱՏՕ-ին անդամության հայտերը։
Էմմա Չոբանյան
