25.06.2026 | 19:18
Ռուբեն Ռուբինյանն ընտրվել է ԱԺ նախագահի թեկնածու. ՏԵՍԱՆՅՈՒԹ
Լրացավ Ավետիսյանների ընտանիքի սպանդի 8 տարին․ Եվրոպական դատարանից դեռ նորություն չկա
Հասարակություն
12.01.2023 | 20:40
Գյումրու Արցախ թաղամասի Մյասնիկյան փողոցի 188 տանը բնակվող Ավետիսյանների 7 հոգանոց ընտանիքի սպանության գործով Եվրոպական դատարանից դեռ որևէ նորություն չկա։ Ավետիսյանների հարսի և երեխաների իրավահաջորդի ներկայացուցիչ, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը դիմել էր Եվրոպական դատարան՝ կյանքի իրավունքի խախտման փաստով ոչ արդյունավետ քննություն իրականացնելու հիմքով։
Սպանությունից 8 տարի անց գյումրեցիները չունեն իրենց հուզող հարցերի պատասխանները՝ ինչո՞ւ սպանդի ենթարկվեց ընտանիքը, ո՞րն էր շարժառիթը, արդյո՞ք իրականում ռուսական 102-րդ ռազմաբազայի պայմանագրային զինծառայող Վալերի Պերմյակովն է սպանություն գործած անձը, եթե՝ այո՝, արդյո՞ք նա միայնակ է գործել, առանց հանցակիցների։
Հիշեցնենք, որ Գյումրու Արցախ թաղամասի Մյասնիկյան փողոցի 188 տանը բնակվող Ավետիսյանների 7 հոգանոց ընտանիքի սպանությունը տեղի էր ունեցել 2015 թվականի հունվարի 12-ի լուսադեմին։ Սպանվել էին Սերյոժա և Հասմիկ Ավետիսյանները, նրանց դուստրը՝ Աիդա Ավետիսյանը, որդին՝ Արմեն Ավետիսյանը, հարսը՝ Արաքսյա Ավետիսյանը և երկու մանկահասակ երեխաները՝ Հասմիկ և Սերյոժա Ավետիսյանները։ Նրանց սպանության մեջ մեղավոր ճանաչվեց ռուսական 102-րդ ռազմաբազայի զինծառայող Վալերի Պերմյակովը։ Շիրակի մարզի ընդհանուր իրավասության դատարանը 2016 թվականի օգոստոսի 23-ին նրան դատապարեց ցմահ ազատազրկման՝ մեղավոր ճանաչելով Ավետիսյանների 7 հոգանոց ընտանիքի սպանության, ավազակային հարձակման և հայ-թուրքական սահմանը հատելու փորձի մեջ։ Ամբողջ դատավարությունն ընթացավ ռուսական ռազմաբազայի տարածքում, իսկ վճռի հրապարակումից հետո Պերմյակովին տեղափոխեցին ՌԴ։ Ըստ ՌԴ արդարադատության նախարարության պաշտոնական հաղորդագրության՝ նա պատիժը կրում է ՌԴ-ի Յամալո-Նենեցկի ինքնավար մարզի թիվ 8 ուղղիչ գաղութում՝ հատուկ պահման ռեժիմում։
Արմիկ Մովսիսյան
