Հայաստանը չպետք է ներգրավվի Ադրբեջանի հետ Լաչինի միջանցքի բացման հարցով բանակցություններին. ՀՀ ԱԺ նախագահ

Հայաստանը չպետք է ներգրավվի Ադրբեջանի հետ Լաչինի միջանցքի բացման հարցով բանակցություններին, քանի որ 2020 թվականի նոյեմբերի 9-ի եռակողմ հայտարարության մեջ Լաչինի միջանցքի մասով Հայաստանը կողմ չէ։ Արցախի իշխանությունները Ադրբեջանի հետ ուղիղ բանակցելու և ուղիղ խոսելու հնարավորություն ունեն և հենց իրենք են զբաղվում խնդրով, իսկ Հայաստանը սատար կկանգնի Արցախի յուրաքանչյուր որոշման։ Ինչպես տեղեկացնում է «Արմենպրես»-ը, լրագրողների հետ ճեպազրույցում այս մասին ասաց ՀՀ ազգային ժողովի նախագահ Ալեն Սիմոնյանը։

Անդրադառնալով Արցախի անվտանգության խորհրդի հայտարարությանը, որում մտահոգություն էին հայտնել ասուլիսի ժամանակ վարչապետ Նիկոլ Փաշինյանի հնչեցրած մի շարք պնդումների և տեսակետների վերաբերյալ, Սիմոնյանն ասաց, Արցախի անվտանգության խորհուրդը, Արցախի իշխանությունները և Արցախի ներկայացուցիչներն ուղիղ բանակցելու և ուղիղ խոսելու հնարավորություն ունեն։

«Եվ ոչ միայն հնարավորություն ունեն, այլ հենց իրենք են զբաղվում դրանով։ Եվ ինչպես վարչապետ Նիկոլ Փաշինյանը նշեց ասուլիսի ժամանակ՝ Հայաստանի Հանրապետությունը յուրաքանչյուր իրենց դիրքորոշմանը սատար կկանգնի։ Եվ, անկեղծ ասած, անհասկանալի է, թե երբ դու ես խոսացող կողմը, ի՞նչ անհամաձայնության մասին է խոսքը»,- ասաց Ալեն Սիմոնյանը:

Ըստ Աժ նախագահի՝ Արցախի իշխանություններն անմիջական կապի մեջ են այս կամ այն ձևով Ադրբեջանի իշխանությունների ներկայացուցիչների հետ, ինչպես նաև՝ Ռուսաստանի զորախմբի ներկայացուցիչների հետ։

«Մշտապես հեռախոսազրույցներ եմ ունենում Արցախի իշխանությունների հետ։ Այս պահին այդ շփումները նվազել են, բայց այդ շփումները կան և կան մարդիկ, ովքեր այդ շփումները իրականացնում են: Կարելի է ասել, որ արդեն երկար ժամանակ է՝ այդ կապը գոյություն ունի։ Կարծում եմ՝ Արցախի իշխանությունները պետք է ֆիքսեն, որ Հայաստանը հայտարարել է՝ սատար կկանգնի իրենց յուրաքանչյուր որոշմանը կշարունակի իր ջանքերն այդ խնդրի լուծման ուղղությամբ»,- շեշտեց Ալեն Սիմոնյանը:։

Հարցին, թե ինչո՞ւ Հայաստանը չի բանակցում Ադրբեջանի հետ Լաչինի միջանցքի հարցով, Ազգային ժողովի նախագահը պարզաբանեց, որ եթե Հայաստանը դառնա կողմ, ուրեմն չեղյալ կհայտարարի 2020 թվականի նոյեմբերի 9-ին եռակողմ հայտարարությունը։

Սիմոնյանը չի բացառում, որ հենց Ադրբեջանի նպատակը դա է ՝ ներքաշել Հայաստանին այս խոսակցության մեջ, որպեսզի փորձի պարտադրել նման միջանցք բացել Հայաստանի տարածքով։

«Ենթադրում եմ, որ Լաչինի միջանցքը փակվել է հենց դրա համար, որ, օրինակ, մեզ պարտադրվի նման միջանցք Հայաստանի տարածքով։ Ինչո՞ւ պետք է մտնենք այդ խոսակցության մեջ»,- ասաց Սիմոնյանը։

Ըստ նրա՝ Հայաստանի արտգործնախարարը նաև Լաչինի միջանցքի պատճառով չմասնակցեց Ռուսաստանի և Ադրբեջանի հետ Մոսկվայում դեկտեմբերին նախատեսված եռակողմ հանդիպմանը։

Հարցին՝ դա չի՞ նշանակում «ձեռքերը լվանալ» Արցախի խնդրից, ինչպես հայտարարում է ընդդիմությունը, Սիմոնյանը պատասխանեց՝ այդպիսի որակում տալն աբսուրդ է։

«Այն, ինչ-որ մենք անում ենք, առավելագույն է, որը Հայաստանը կարող է թույլ տալ։ Ձեռքերը լվանալ կլիներ, որ որևիցե ձևով դուրս գայինք համագործակցությունից, բայց Հայաստանը ամեն ինչ անում է և շարունակելու է ամեն ինչ անել»,- եզրափակեց Սիմոնյանը։