Նուրսուլթան Նազարբաևին զրկել են պատվավոր սենատորի կարգավիճակից

Ղազախստանի առաջին նախագահ Նուրսուլթան Նազարբաևը կորցրել է պատվավոր սենատորի կարգավիճակը․ այդ կոչումը բացառվել է երկրի Սենատի (խորհրդարանի վերին պալատի) կանոնակարգից։ ՌԻԱ Նովոստիի փոխանցմամբ՝ այս մասին ասել է Սենատի նախագահ Մաուլեն Աշիմբաևը։

«Մենք մեր կանոնակարգից հանել ենք պատվավոր սենատորի կոչումը։ Սրանք գործողություններ են, որոնք իրականացվում են համապետական հանրաքվեի արդյունքներով»,- խորհրդարանում լրագրողներին ասել է Աշիմբաևը։

Խոսնակը նաև նշել է, որ ուրբաթ խորհրդարանի պատգամավորները պալատների համատեղ նիստում կքննարկեն «Հանրապետության առաջին նախագահ Էլբասի (ազգի առաջնորդ) մասին» սահմանադրական օրենքն անվավեր ճանաչելու մասին օրինագիծը։

Նազարբաևը, որը ղեկավարել է Ղազախստանը շուրջ 30 տարի, նախագահի պաշտոնից հրաժարական է տվել 2019 թվականի մարտի 20-ին։ Պետության ղեկավար է դարձել Կասիմ-Ժոմարտ Տոկաևը, որը նախկինում եղել է Սենատի նախագահը։ Իր երդմնակալության ժամանակ նա հայտարարել էր, որ անհրաժեշտ է համարում Նազարբաևին պատվավոր սենատորի կարգավիճակ տալ։

Նույն թվականի մայիսի վերջին Սենատի պատգամավորները որոշում ընդունեցին առաջին նախագահին պատվավոր սենատորի կարգավիճակ շնորհելու մասին։ Պալատի մամուլի ծառայությունն այդ ժամանակ պարզաբանեց, որ այս կարգավիճակը Նազարբաևին շնորհվել է «Ղազախստանի Հանրապետության սահմանադրական և իրավական հիմքերի ձևավորման գործում որպես ժողովրդավարական, աշխարհիկ, իրավական և սոցիալական պետության, ինչպես նաև Ղազախստանի Հանրապետության սահմանադրական և իրավական հիմքերի ձևավորման գործում ունեցած ակնառու ավանդի համար»։

Տաթև Ֆռանգյան