17.08.2026 | 11:05
Բանավոր հրահանգ էիք տվել, որ 56 հազար բնակչություն ունեցող համայնքը հոսանքազրկեն․ Գարիկ Սարգսյանը՝ Դավիթ Ղազինյանին․ ՏԵՍԱՆՅՈՒԹ
ԵՄ-ն և ՆԱՏՕ-ն միասին կաշխատեն կարևոր ենթակառուցվածքների պաշտպանության ուղղությամբ
Քաղաքականություն
11.01.2023 | 20:52
Եվրամիությունը և ՆԱՏՕ-ն ստեղծել են կարևորագույն ենթակառուցվածքների պաշտպանության հարցերով համատեղ աշխատանքային խումբ, մասնավորապես՝ էներգամատակարարման ոլորտում։ Այս մասին Բրյուսելում հայտարարել են Եվրահանձնաժողովի ղեկավար Ուրսուլա ֆոն դեր Լեյենը և ՆԱՏՕ-ի գլխավոր քարտուղար Յենս Ստոլտենբերգը։
Աշխատանքային խմբի շրջանակում երկու կողմերի փորձագետները կհամագործակցեն՝ բացահայտելու կարևոր ենթակառուցվածքներին սպառնացող հիմնական վտանգները և կուսումնասիրեն ռազմավարական խոցելիությունը, նշել է ԵՀ ղեկավարը։
Միևնույն ժամանակ, նրա խոսքով, պետք է միջոցներ մշակել կրիտիկական ոլորտներում դիմակայունության ամրապնդման համար: Խմբի ուշադրության կենտրոնում, առաջին հերթին, կլինեն տրանսպորտը, էներգետիկան, թվայնացումը և տիեզերքը։
«Մենք ցանկանում ենք միասին մտածել, թե ինչպես կարող ենք մեր կարևոր ենթակառուցվածքները, տեխնոլոգիաները և մատակարարման շղթաներն ավելի դիմացկուն դարձնել պոտենցիալ սպառնալիքների նկատմամբ, և ինչ միջոցներ կարող ենք ձեռնարկել՝ հնարավոր խոցելիությունը նվազեցնելու համար»,- իր հերթին ասել է Ստոլտենբերգը:
Կրիտիկական ենթակառուցվածքների պաշտպանությունն ուժեղացնելու անհրաժեշտությամբ ԵՄ-ի և ՆԱՏՕ-ի առաջնորդները հիմնավորել են էներգակիրները զենքի վերածելու՝ ՌԴ նախագահ Վլադիմիր Պուտինի փորձերով, ինչպես նաև «Հյուսիսային հոսք» և «Հյուսիսային հոսք 2» գազատարների ենթադրյալ դիվերսիաներով։
Հիշեցնենք՝ նախօրեին ԵՄ-ն և ՆԱՏՕ-ն ստորագրել են համագործակցության մասին համատեղ հռչակագիր, որի նպատակն է ամրապնդել և ընդլայնել փոխգործակցությունը, ինչպես նաև գործընկերությունը նոր մակարդակի հասցնել։
Տաթև Ֆռանգյան
