12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Եթե ՀԱՊԿ-ն զորավարժությամբ ուզում է սարսափեցնել ադրբեջանցիներին, պիտի նախ դատապարտի ագրեսիան․ Արման Եղոյան․ ՏԵՍԱՆՅՈՒԹ
Քաղաքականություն
11.01.2023 | 20:20
Եթե պաշտոնական Երևանը չի տվել իր համաձայնությունը ՀԱՊԿ-ին, ռազմական այդ դաշինքի զորավարժությունները չեն կարող կայանալ Հայաստանում։ Factor TV-ի հարցազրույցում ասում է ՀՀ ԱԺ «Քաղաքացիական պայմանագիր» խմբակցության պատգամավոր Արման Եղոյանը։
Չնայած վարչապետ Փաշինյանը երեկ հայտարարել է, որ ՀԱՊԿ-ի միավորված շտաբին գրավոր հայտնել են, որ Հայաստանում նման զորավարժություններ անցկացնելը նպատակահարմար չեն համարում, ՀԱՊԿ-ի քարտուղարությունը և միավորված շտաբը հայտարարել են, որ գտնում են՝ կոալիցիոն խաղաղապահ ուժերի զորավարժությունների մասով Հայաստանի պարտավորությունները կկատարվեն։ ՀԱՊԿ-ի մամուլի քարտուղար Վլադիմիր Զայնետդինովն ասել է, որ հայկական կողմից պաշտոնապես ծանուցում չեն ստացել այդ զորավարժությունները չեղարկելու մասին․ «Եթե ՀՀ-ն չի տալիս իր համաձայնությունը, չեն կարող մեր տարածքում զորավարժություններ լինել»,- ի պատասխան՝ հավաստիացրեց իշխանական պատգամավորը։
Նոյեմբերի 23-ին էլ Փաշինյանը Երևանում չէր ստորագրել ՀԱՊԿ-ի նիստի փաստաթղթերը, որոնցից մեկը ՀՀ-ի մասին էր, և անբավարար էր գնահատվել ՀԱՊԿ-ի անգործությունը։ Փաշինյանն ասաց՝ ՀԱՊԿ գագաթնաժողովն ավարտվել է, բայց խոսակցությունը չի ավարտվել։ Ի՞նչ է ակնկալում ՀՀ իշխանությունը, որ հապաղում է և դուրս չի գալիս ՀԱՊԿ -ից։
«Վարչապետը նաև ասել է, որ ՀԱՊԿ-ն նախևառաջ պետք է գնահատի տվյալ իրավիճակը, հետո նոր անդրադառնա դրա լուծմանը։ Եթե դու չես գնահատում, թե ինչ է կատարվում, չես կարող համապատասխան մոտեցում ցուցաբերել։ Ադրբեջանի զինուժը մի քանի դրվագով ներխուժել է ՀՀ սուվերեն տարածք, և դա փաստ է արձանագրված, հետևաբար, եթե մենք ՀԱՊԿ-ից ակնկալում ենք որևէ բան կամ նրանք են ակնկալում, շատ տրամաբանական կլիներ, որ ասեին։ ՀԱՊԿ-ի արձանագրումը բնականաբար ունենալու է քաղաքական կշիռ և ազդելու է ընդհանուր գեոպոլիտիկ պրոցեսների վրա։ Սակայն շահերի տեսանկյունից հասկանալի պատճառով խուսափում են դա անել»։
Ընդդիմությունը քննադատեց ՀՀ իշխանությանը, որ ՀԱՊԿ-ի զորավարժությունից հրաժարվելով՝ ՀՀ-ն բաց թողեց թուրքերին և ադրբեջանցիներին սարսափեցնելու շանսը․ «Եթե ՀԱՊԿ-ն մտադիր էր սարսափեցնել ադրբեջանցիներին և թուրքերին, կարելի էր նախ խոսքով սարսափեցնել, գոնե նախատել, կշտամբել։ Բայց եթե խոսքով չեն ասում, գործով ո՞նց են սարսափեցնելու»,- պատասխանեց իշխանական պատգամավորը։
Հարցազրույցն ամբողջությամբ՝ տեսանյութում։
Ռոբերտ Անանյան
