29.10.2026 | 16:10
Արամ Վարդևանյանի ճեպազրույցը` ՈւՂԻՂ
ՌԴ-ում մոբիլիզացվածը 5,5 տարվա ազատազրկման է դատապարտվել՝ պատերազմ ուղարկվելուց առաջ վատ նախապատրաստման համար սպայի հետ կոնֆլիկտի պատճառով
Քաղաքականություն
11.01.2023 | 23:01
ՌԴ-ում մոբիլիզացված Ալեքսանդր Լեշկովը, որը հրել և հայհոյել է սպային մերձմոսկովյան «Պատրիոտ» այգում գտնվող ուսումնավարժական կենտրոնում, դատապարտվել է 5,5 տարվա ազատազրկման խիստ ռեժիմի գաղութում։ BBC-ի ռուսական ծառայությունը, հղում անելով Օդինցովոյի կայազորային զինվորական դատարանի մամուլի ծառայությանը, գրում է, որ Լեշկովը մեղավոր է ճանաչվել մոբիլիզացիայի ընթացքում սպային ծեծի ենթարկելու համար (ՌԴ Քրեական օրենսգրքի 334-րդ հոդվածի 3-րդ մաս): Այս հոդվածը, որը նախատեսում է 5-ից 15 տարի ժամկետով ազատազրկում, հայտնվել է ՌԴ Քրեական օրենսգրքում 2022 թվականի սեպտեմբերին։ Համապատասխան օրենքն ընդունվել է Պետդումայի կողմից սեպտեմբերի 20-ին՝ Ռուսաստանում, այսպես կոչված, մասնակի մոբիլիզացիա հայտարարելուց մեկ օր առաջ։
Լեշկովի պաշտպանական կողմը բողոքարկել է դատավճիռը, բողոքը պետք է քննի Արևմտյան 2-րդ շրջանային զինվորական դատարանը։
Լեշկովը սոցցանցերում նոյեմբերի 13-ին հայտնված տեսանյութի հերոսն է։ Սոցցանցերում հրապարակված տեսանյութում «Պատրիոտ» ռազմական կենտրոնում հավաքված մոբիլիզացվածներն իրենց վրդովմունք էին հայտնում Ուկրաինա դեմ պատերազմում ճակատ ուղարկվելուց առաջ վատ պատրաստվածությունից և անորակ սպասարկումից։
«Սա կրակելու, վարժանքների նմանակում է։ Արի այստեղ կրակի, այնտեղ երկու պարկուճ լիցքավորի, այստեղ տանկային պալիգոնում երևակայական թշնամի ձևացրում, տրա-տա-տա․․․»,- տեսանյութում ասում է Լեշկովը՝ դիմելով իր կողքին կանգնած փոխգնդապետին։
Սպայի հետ վիճողը վիրավորել է նրան և պնդել, որ ինքը խոսում է բոլոր մոբիլիզացվածների անունից։ Ինչ-որ պահի մոբիլիզացվածը հրում է սպային։ Դեպքից հետո Լեշկովը բերման է ենթարկվել և ձերբակալվել՝ զինվորական ծառայության ընթացքում բռնություն գործադրելու և ղեկավարին վիրավորելու մեղադրանքով։
Լեշկովը չի ընդունել մեղքը, սակայն հաստատել է սպայի նկատմամբ կոպիտ վերաբերմունքի փաստը՝ ասելով, որ ինքը բռնություն չի կիրառել, այլ պաշտպանվել է։
Տաթև Ֆռանգյան
