09.12.2025 | 18:26
Դրոշմավորման QR կոդերի արժեքը կնվազի․ նոր գինը կկիրառվի հունվարի 1-ից
Թուրքիայի ֆուտբոլի ֆեդերացիան Պոլսո Հայոց պատրիարքին հրավիրել է Երևանում կայանալիք Հայաստան-Թուրքիա հանդիպմանը
Քաղաքականություն
11.01.2023 | 16:40
Թուրքիայի ֆուտբոլի ֆեդերացիայի փոխնախագահ Մուրադ Աքսուի գլխավորած պատվիրակությունն այցելել է Պոլսո Հայոց պատրիարք Սահակ արքեպիսկոպոս Մաշալյանին․ գրում է Nouvelles d’Arménie-ն։
Հաղորդագրության համաձայն՝ հյուրերը պատրիարքին հրավիրել են ներկա լինել մարտի 25-ին Երևանում կայանալիք Euro 2024-ի ընտրական փուլի Հայաստան-Թուրքիա ֆուտբոլային հանդիպմանը։ Ֆեդերացիայի փոխնախագահը Մաշալյանին նաև անվանական մարզաշապիկ է նվիրել։
Նշենք, որ պատասխան խաղը տեղի է ունենալու Թուրքիայում՝ սեպտեմբերի 8-ին։
Հիշեցնենք, որ Թուրքիայի ԱԺ-ի արտաքին հարաբերությունների հանձնաժողովի նախագահ Աքիֆ Քըլըչը, որը, ի դեպ, Հայաստանի ու Թուրքիայի հարաբերությունների կարգավորման գործընթացում թուրքական կողմի հատուկ ներկայացուցիչ Սերդար Քըլըչի զարմիկն է, անդրադարձել էր Հայաստանի հետ հարաբերությունների կարգավորման գործընթացին՝ չբացառելով «Ֆուտբոլային դիվանագիտություն 2»-ը։
«Մեր հավաքականը այնտեղ է մեկնելու, միգուցե մենք էլ գնանք։ Հարաբերությունների կարգավորման գործընթացը լավ է ընթանում։ Ադրբեջանի հետ ևս դրական ընթացք կա․ այն առանց սադրանքների պետք է անցնի»,- ասել էր Աքիֆ Քըլըչը։
Հիշեցնենք՝ «Ֆուտբոլային դիվանագիտություն» եզրույթը շրջանառության մեջ դրվեց Սերժ Սարգսյանի նախագահության օրոք։ 2009-ին դիվանագիտական հարաբերություններ հաստատելու համար Հայաստանն ու Թուրքիան Ցյուրիխում արձանագրություններ ստորագրեցին, որի շրջանակներում Սարգսյանն ու այդ ժամանակվա Թուրքիայի նախագահ Գյուլը փոխադարձ այցելություններով ներկա եղան երկու երկրների ֆուտբոլի ազգային հավաքականների խաղերին, սակայն գործընթացը փակուղում հայտնվեց նույն տարում, հայկական կողմի ներկայացմամբ, Թուրքիայի առաջ քաշած նախապայմանների պատճառով։ Հայ-թուրքական արձանագրությունները Հայաստանը չեղարկեց 2018 թվականին:
Անահիտ Խաչատրյան
