25.11.2024 | 15:17
Խախտումներ շինհրապարակում. ԲԸՏՄ
Մոսկվան հետևում է իրավիճակին․ Պեսկովը՝ Թուրքիայի կողմից Ուկրաինային կասետային զինամթերքի մատակարարման մասին
Քաղաքականություն
11.01.2023 | 17:26
Դժվար է խոսել Թուրքիայի կողմից Ուկրաինային կասետային զինամթերքի մատակարարումների վերաբերյալ տեղեկություննների հավաստիության մասին, սակայն Մոսկվան ուշադիր հետևում է իրավիճակին։ Այս մասին հայտարարել է ՌԴ նախագահի խոսնակ Դմիտրի Պեսկովը, գրում է ՏԱՍՍ-ը։
«Իհարկե, բարդ է խոսել այդ հաղորդումների հավաստիության մասին։ Գիտեք, որ ֆեյքերն ավելին են, քան հավաստի և ճշմարիտ հաղորդումները։ Դրա համար մենք ուշադիր հետևում ենք իրավիճակին»,- ասել է Պեսկովը։
Նա նշել է, որ ՌԴ-ն լավատեղյակ է Թուրքիայի կողմից Ուկրաինային «Բայրաքթար» անօդաչուների և դրանց համար զինամթերքի մատակարարումների մասին։ Միաժամանակ, Պեսկովն ասել է, որ Թուրքիան, որպես ՆԱՏՕ-ի անդամ երկիր, ունի իր երկկողմ հարաբերություններն ու պարտավորությունները այլ երկրների հետ։
«Բայց, միաժամանակ, Թուրքիայի հետ մեզ միավորում են գործընկերային հարաբերությունները, որոնք հիմնված են փոխշահավետության, փոխըմբռնման, փոխադարձ հարգանքի և ամենաբարդ խնդիրները քննարկելու փոխադարձ պատրաստակամության վրա»,- ընդգծել է ՌԴ նախագահի մամուլի խոսնակը։
Հավելենք, որ Foreign Policy-ն, վկայակոչելով ամերիկացի ու եվրոպացի պաշտոնյաներին, հայտնել է, որ Թուրքիան 2022 թվականի նոյեմբերից Ուկրաինային սկսել է Սառը պատերազմի ժամանակ ԱՄՆ-ում մշակված կասետային զինամթերք մատակարարել։
Էմմա Չոբանյան
