Եթե ՀՀ իշխանությունն ասում է Արցախին՝ գնացեք պայքարեք ձեր իրավունքի համար, մենք փրկում ենք ՀՀ-ն, թող հրաժարվի իր ստորագրություններից․ Մարգարիտա Քարամյան. ՏԵՍԱՆՅՈՒԹ

Factor TV–ի հարցազրույցը «Վերադարձ դեպի Դիզակ» ՀԿ ղեկավար Մարգարիտա Քարամյանի հետ

-Ի՞նչ վիճակ է Արցախում։ Գիտեմ, որ Ձեր հարազատներից շատերն այս պահին շրջափակման մեջ են։

–Բլոկադան, պաշարումն ընդհանրապես պատերազմի ձևերից մեկն է․ այսինքն՝ պատերազմը չի վերջացել։ Ադրբեջանը հիմա պատերազմի այլ մեթոդաբանություն է օգտագործում, քանի որ հասկացել է, որ ռազմական գործողությունները,  սպանություններն իր համար մեծ խնդիրներ են ստեղծում։ Ադրբեջանը միշտ էլ ավելի գրագետ է աշխատել միջազգային իրավունքի և միջազգային օրենքների հետ, իրենք ամեն ինչ անում են, որ նույնիսկ իրենց ամենաստոր արարքներն ընկնեն միջազգային նորմերի շրջանակում։ Այլ բան է, որ միջազգային հանրությունում միջազգային օրենքներն ու իրավունքներն այնքան են իրար խառնվել, որ գրեթե չեն գործում։ Բայց Ուկրաինայի օրինակով տեսնում ենք, որ դեռ աշխարհում գործում է ուժի իրավունքը։

-Փաստորեն, Ադրբեջանը դեմ է ոչ միայն Ռուսաստանի առաջարկին՝ ԼՂ կարգավիճակի հարցը թողնել ապագային, այլ նաև Արևմուտքից հնչող այն գաղափարին, որ միջազգային իրավունքի մեխանիզմով խոսակցություն տարվի Ստեփանակերտի հետ անվտանգային իրավունքների շուրջ․ այսինքն՝ Ալիևը երկու գաղափարին էլ դեմ է՝ չնայած և՛ Մոսկվա է գնում, և՛ Վաշինգտոն, և՛ Բրյուսել։ Ըստ Ձեզ՝ ո՞րն է Ալիևի ծրագիրը Արցախի վերաբերյալ։

-Իլհամ Ալիևի ծրագիրը «Արցախն առանց հայերի» ծրագիրն է, և նա այդ մասին մեկ անգամ չէ, որ հայտարարել է։ Նա հայտարարել է, որ դա Ադրբեջանի ներքին խնդիրն է, որի մասին ոչ մեկի հետ չի խոսելու՝ ո՛չ Ռուսաստանի, ո՛չ Արևմուտքի, ո՛չ էլ, առավել ևս, հայերի հետ։ 30 տարի իրենց առջև խնդիր են դրել, որ Արցախն Ադրբեջանի տարածք է, և կարողացել են միջազգային հանրությանը համոզել դրանում։ Ի՞նչ ենք արել մենք․ գրեթե ոչինչ․․․

-Եվ Ադրբեջանը տարածքից է խոսում, մարդկանց մասին շատ հաճախ չի խոսում։

-Այո՛, մարդկանց ասում է՝ դուք ապրում եք իմ երկրում, պետք է ապրեք այնպես, ինչպես թելադրում եմ։

Հարցազրույցն ամբողջությամբ՝ տեսանյութում։

Ռոբերտ Անանյան