08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ՌԴ-ի, Թուրքիայի և Սիրիայի ԱԳ նախարարների հանդիպումը Մոսկվայում կարող է տեղի ունենալ հունվարին
Քաղաքականություն
11.01.2023 | 22:20
ՌԴ-ի, Թուրքիայի և Սիրիայի ԱԳ նախարարների հանդիպումը կարող է տեղի ունենալ հունվարի 14-16-ը Մոսկվայում։ Այս մասին հայտնում է Hürriyet-ը՝ հղում անելով սեփական աղբյուրներին, փոխանցում է ՌԻԱ Նովոստին։
Ավելի վաղ դիվանագիտական աղբյուրը ՌԻԱ Նովոստիին հայտնել էր, որ Ռուսաստանի, Թուրքիայի և Սիրիայի ԱԳ նախարարներ Սերգեյ Լավրովի, Մևլութ Չավուշօղլուի և Ֆեյսալ Միքդադի հանդիպման ժամկետները մշակվում են, վերջնական դեռևս համաձայնեցված չեն։
«Մոսկվայում անցկացվելիք բանակցությունների օրվա առնչությամբ երկու սցենար կա։ Մևլութ Չավուշօղլուն, որը հիմա Աֆրիկյան երկրներում շրջագայության է, Թուրքիա է վերադառնալու հունվարի 14-ին։ Ենթադրվում է, որ նա կարող է Մոսկվա գնալ հունվարի 14-16-ն ընկած ժամանակահատվածում։ Երկրորդ սցենարն այն է, որ Չավուշօղլուն հունվարի 17-ին կմեկնի ԱՄՆ, իսկ Մոսկվա կայցելի Վաշինգտոն այցից հետո»,- գրում է թուրքական պարբերականը։
Աղբյուրը նշում է, որ սպասվելիք բանակցություններում կրիտիկական թեմաներ են շոշափվելու։ Ըստ Hürriyet-ի՝ քննարկվելու են «Սիրիայում իրավիճակը, այդ երկրի հյուսիսում տեղի ունեցող իրադարձությունները, ահաբեկչական կազմակերպությունների դեմ պայքարը», ինչպես նաև փախստականների վերադարձը Թուրքիա։
«Նախարարների հանդիպման ժամանակ օրակարգում կլինի նաև հարաբերությունների կարգավորման ճանապարհային քարտեզը»,- գրում է լրատվականը։
Հավելենք, որ անցյալ տարվա դեկտեմբերին էլ Մոսկվայում տեղի էր ունեցել Թուրքիայի, Սիրիայի և ՌԴ-ի պաշտպանության նախարարների ու հետախուզական ծառայությունների ղեկավարների հանդիպումը։ Սա Թուրքիայի և Սիրիայի պաշտոնյաների միջև առաջին հանդիպումն էր 2011 թվականից ի վեր։
Էմմա Չոբանյան
