05.11.2024 | 18:30
Նախաքննությամբ ձեռնարկված միջոցառումների արդյունքում 900 միլիոն դրամ է վերադարձվել պետությանը
Ալիևը մտահոգություն է հայտնել, որ Հայաստանը ժամանակակից զինատեսակներ է գնում և դժգոհել Հնդկաստանից
Քաղաքականություն
10.01.2023 | 20:36
Ադրբեջանի նախագահ Իլհամ Ալիևը տեղական հեռուստաընկերություններին տված հարցազրույցում մտահոգություն է հայտնել Հայաստանի կողմից տարբեր զինատեսակների ձեռքբերման կապակցությամբ և կրկին սպառնալիքներ հնչեցրել։
«Ես բազմիցս զգուշացրել եմ հայկական կողմին, որ իզուր է միջոցներ ծախսում սպառազինության վրա։ Նախ՝ դա չի օգնի ձեզ, և երկրորդ՝ կարող է պատրանք ստեղծել որոշ ռևանշիստական ուժերի մոտ, որ դուք կկարողանաք ռևանշի հասնել։ Եթե տեսնենք, որ մեզ համար որևէ վտանգ կա, ապա անմիջապես կճնշենք այն՝ անկախ նրանից, թե որտեղ է հայտնվել այդ սպառնալիքը՝ մեր տարածքո՞ւմ, թե՞ մեր սահմաններից դուրս։ Սա մեր օրինական իրավունքն է»,- ասել է Ալիևը:
Խոսելով Հայաստանին զենքի մատակարարումների մասին՝ Ադրբեջանի նախագահը դժգոհություն է հայտնել Հնդկաստանից։
«Նման փորձեր կան։ Մենք տեսնում ենք, թե որ երկրներն են պատրաստվում զենք տալ Հայաստանին։ Ցավոք, նրանց թվում է Հնդկաստանը, և մենք դա համարում ենք ոչ բարեկամական քայլ, քանի որ այդ հարձակողական զինատեսակների թիրախը միայն Ադրբեջանն է։ Իհարկե, մենք ձեռնարկում ենք անհրաժեշտ միջոցները և չենք կարող թույլ տալ, որ Հայաստանը վտանգ ներկայացնի մեզ համար»,- ասել է Ադրբեջանի նախագահը։
Էմմա Չոբանյան
