Փաշինյանը՝ Երևան-Բաքու անվստահության մասին․ Վարդազարյան-Ջհանգիրյան զրույցի քրգործը կվերաբացվի․ Լուրեր

• Խաղաղության պայմանագրի համատեքստում Հայաստանը և Ադրբեջանը, ըստ Նիկոլ Փաշինյանի, պատրաստ են ստորագրել միմյանց տարածքային ամբողջականությունը ճանաչող հայտարարության տակ, բայց տարբեր բաներ են հասկանում դրա ներքո։ Այսօրվա ասուլիսում վարչապետը նշել է, թե Ադրբեջանում ունեն մտահոգություն, որ Հայաստանը կարող է ապահովագրել իր տարածքային ամբողջականությունը, հետո նոր պահանջներ ներկայացնել։ Նույն մտահոգությունը, ըստ Փաշինյանի, կա նաև Հայաստանում։ Արցախի հայության ճակատագրի մասին Փաշինյանն ասել է, որ Ադրբեջանը երկու տարբերակ է դիտարկում․ կամ հայերը կապրեն առանց յուրահատուկ կարգավիճակի, կամ հայերը դուրս կգան Արցախի տարածքից։
• Հայաստանում Ճապոնիայի դեսպան Ֆուկուշիմա Մասանորին հայտարարություն է տարածել, որ մտահոգ է Լաչինի միջանցքի շուրջ զարգացումների մասին հաղորդումներով։ Կոչ է անում կողմերին թուլացնել լարվածությունը և ապահովել միջանցքի երկայնքով տեղաշարժի ազատությունն ու անվտանգությունը՝ համաձայն կողմերի ձեռք բերած պայմանավորվածությունների։
• ԲԴԽ նախկին նախագահ Ռուբեն Վարդազարյանի և ԲԴԽ նախագահի նախկին ժամանակավոր պաշտոնակատար Գագիկ Ջհանգիրյանի խոսակցության ձայնագրության առիթով սկսված քրեական վարույթը կարճելու որոշումը վերացվել է։ Որոշումը կայացրել է Գլխավոր դատախազի տեղակալ Արթուր Պողոսյանը։ Դատախազը նաև որոշել է գործն, ըստ քննչական ենթակայության, ուղարկել Հակակոռուպցիոն կոմիտե:

Այս ժամի լուրերը՝ տեսանյութում։