Ես պատրաստ եմ եղել զիջման, բայց զիջման սահմանը չեմ տեսել․ Նիկոլ Փաշինյան․ ՏԵՍԱՆՅՈՒԹ

«Այն, ինչ տեղի է ունեցել 2020-ին, սոցիալ-հոգեբանական առումով 100 տոկոսով շատ երկար իրադարձությունների կուլմինացիա է»,- այսօր հրավիրված ասուլիում նշեց վարչապետ Նիկոլ Փաշինյանը։

«Այո, 2020-ի սեպտեմբերի 27-ից նոյեմբերի 8-ը կարող էին զոհեր չլինեին, բայց դա չի նշանակում, որ 2021-ի հոկտեմբերի 6-ից փետրվարի 17-ը այդ նույն զոհերը կամ կրկնակի ավել զոհեր չէին լինի: Խոսքը սրա մասին է, որովհետև ամեն ինչը գին ունի: Մենք այդ գինը վճարել ենք, վճարում ենք և պիտի վճարենք: Մենք չգիտեի՞նք, որ էս պատմության վերջը էս է լինելու:

Մենք բոլորս պատրաստ էի՞նք գնալ թուղթ ստորագրել, որ տարածքներից 5-ը վերադարձվում են, մյուս երկուսը ժամանակավորապես են վերադարձվում, առանց ԼՂ կարգավիճակի ճշգրտման, առանց կարգավիճակի հեռանկարի՞: Մենք բոլորս դրան պատրա՞ստ էինք: Հիմա հետահայաց կարող ենք ասել, որ այդպես ավելի լավ կլիներ: Իհարկե, կարող ենք ասել: Մենք գուցե «հայի հետին խելքի» զոհն ենք»:

Անդրադառնալով դիտարկմանը, որ հասարակությունը պատրաստ չէր, բայց վարչապետը, լինելով գլխավոր գերագույն հրամանատար, պետք է տիրապեր իրավիճակին, Փաշինյանը նշեց․ «Ես էլ պատրաստ չէի, որովհետև ես հո օդի՞ց ընկած չեմ, բա ես էլ քաղաքական կենսագրություն ունեմ, ես էլ պատկերացում ու ընկալում ունեմ: Բայց պրոբլեմն ամենևին այն չէ, որ ես պատրաստ չեմ եղել կամ այսօր պատրաստ չեմ։ Ավելին ասեմ՝ ես պատրաստ եմ եղել զիջման, բայց այդ զիջման սահմանը չեմ տեսել, թե մինչև ուր պետք է զիջեմ, որ ամեն ինչ ավարտվի: Որովհետև եթե զիջման չափը տեսանելի է, դու կարող ես դա լրջորեն քննարկել, բայց այն բովանդակությունը, որ եղել է, և այսօր էլ խնդիրը դրա մեջ է:

Խնդիրն այն է, որ պարզ չէ, թե որտեղ է զիջման, փոխզիջման կամ ճկունության սահմանը, որ ես գամ ասեմ՝ ժողովո՛ւրդ, էսքանը զիջվել է, բայց վերջ․ կարևորը երկրի համար ապահովել եմ տևական կայուն խաղաղություն։ Պրոբլեմն այսօր դա է, որ չի երևում զիջման գիծը»:

Մանրամասները՝ տեսանյութում։