30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Ստոլտենբերգը համոզված է, որ Շվեդիան և Ֆինլանդիան կմիանան ՆԱՏՕ-ին՝ չնայած գործընթացի ձգձգմանը
Քաղաքականություն
10.01.2023 | 21:10
ՆԱՏՕ-ի գլխավոր քարտուղար Յենս Ստոլտենբերգը վստահություն է հայտնել, որ Ֆինլանդիան և Շվեդիան կմիանան ռազմական դաշինքին՝ մի քանի օր անց այն բանից հետո, երբ Ստոկհոլմը հայտարարել է, որ արել է հնարավոր ամեն ինչ՝ բավարարելու Թուրքիայի վերապահումները իր անդամակցության վերաբերյալ, գրում է Associated press-ը։
«Վստահ եմ, որ անդամակցության գործընթացը կավարտվի, և ՆԱՏՕ-ի բոլոր դաշնակիցները կվավերացնեն անդամակցության արձանագրությունները իրենց խորհրդարաններում։ Դա վերաբերում է նաև Թուրքիային»,- ասել է Ստոլտենբերգը դաշինքի Բրյուսելի կենտրոնակայանում լրագրողների հետ զրույցում։
Նա նշել է, որ անդամակցության գործընթացը սովորաբար տարիներ է տևում, սակայն բոլոր 30 անդամները հուլիսին հրավիրել են Ֆինլանդիային և Շվեդիային միանալ և ստորագրել իրենց անդամակցության արձանագրությունները: Այդ ժամանակից ի վեր 28 երկրներ ազգային ընթացակարգերով հավանություն են տվել այդ քայլին: Դա չեն արել միայն Թուրքիան և Հունգարիան։
«Սա ամենաարագ անդամակցության գործընթացն է ՆԱՏՕ-ի ժամանակակից պատմության մեջ»,- ասել է Ստոլտենբերգը՝ հավելելով, որ Միացյալ Նահանգները և մյուս դաշնակիցները երկու երկրներին երկկողմանի «անվտանգության երաշխիքներ» են առաջարկել, քանի դեռ նրանք լիարժեք անդամ չեն:
Էմմա Չոբանյան
