09.10.2026 | 10:21
Թուրքմենստանում ընթանում է ԱՊՀ պետությունների ղեկավարների գագաթնաժողովը՝ Նիկոլ Փաշինյանի մասնակցությամբ
Գագիկ Ջհանգիրյանի և Ռուբեն Վարդազարյանի խոսակցության ձայնագրության գործով վարույթը կարճելու որոշումը վերացվել է
Հասարակություն
10.01.2023 | 16:03
ԲԴԽ նախկին նախագահ Ռուբեն Վարդազարյանի և ԲԴԽ նախագահի նախկին ժամանակավոր պաշտոնակատար Գագիկ Ջհանգիրյանի խոսակցության ձայնագրության առիթով սկսված քրեական վարույթը կարճելու որոշումը վերացվել է։ Որոշումը կայացրել է Գլխավոր դատախազի տեղակալ Արթուր Պողոսյանը։ Դատախազը նաև որոշել է գործն, ըստ քննչական ենթակայության, ուղարկել Հակակոռուպցիոն կոմիտե: Այս մասին Factor.am-ի հետ զրույցում ասաց Ռուբեն Վարդազարյանի փաստաբան Հովհաննես Խուդոյանը:
Հիշեցնենք, որ 2022 թվականի հունիսին Ռուբեն Վարդազարյանն ասուլիսում հրապարակել էր ձայնագրություն, որը կատարվել է 2021 թվականի փետրվարի 20-ին, երբ Ջհանգիրյանը նոր էր ընտրվել ԲԴԽ անդամ։ Ձայնագրության մեջ Ջհանգիրյանը Վարդազարյանին հորդորում է հրաժարվել ԲԴԽ նախագահի պաշտոնից՝ փոխարենը երաշխավորելով, որ Վարդազարյանի վերաբերյալ քրեական գործերն ու կարգապահական վարույթը կկարճվի։ Դեպքի առթիվ քրեական վարույթ է նախաձեռնվել, որը շուրջ կես տարի քննությունից հետո կարճվել էր։
Հատկանշական է, որ թեև ձայնագրության առնչություն ունեցող անձինք պաշտոնյաներ են, գործը քննվել էր Քննչական կոմիտեում և ոչ թե Հակակոռուպցիոն կոմիտեում։ Այժմ, փաստորեն, դատախազը ոչ միայն վերացրել է վարույթը կարճելու որոշումը, այլ նաև փոխել դրա քննչական ենթակայությունը։
Արաքս Մամուլյան
