16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
ՀՀ-ն մնում է Ռուսաստանի շատ սերտ դաշնակիցը․ Պեսկովն արձագանքել է Հայաստանում ՀԱՊԿ զորավարժություններ չանցկացնելու՝ Երևանի որոշմանը
Քաղաքականություն
10.01.2023 | 14:48
Հայաստանը մնում է Ռուսաստանի «շատ սերտ դաշնակիցը», և Երևանի հետ երկխոսությունը կշարունակվի։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը՝ պատասխանելով ՌԲԿ-ի հարցին, թե ի՞նչ է մտածում Կրեմլը ՀՀ վարչապետ Նիկոլ Փաշինյանի՝ 2023 թվականին ՀԱՊԿ-ի զորավարժությունները Հայաստանում անցկացնելուց հրաժարվելու մասին։
«Սա Հայաստանի վարչապետի՝ բավականին նոր հայտարարություն է։ Կարծում եմ, որ ՀԱՊԿ գործընկերները կապի մեջ կլինեն, կհստակեցնեն Հայաստանի դիրքորոշման մանրամասները։ Ամեն դեպքում, Հայաստանը մեր շատ մտերիմ դաշնակիցն է, մենք կշարունակենք երկխոսությունը՝ ներառյալ այն հարցերը, որոնք հիմա շատ բարդ են»,- ասել է Պեսկովը։
Նա, սակայն, չի նշել, թե ո՞ր հարցերն են բարդ համարում։
Հիշեցնենք, որ այսօրվա մամուլի ասուլիսում ՀՀ վարչապետ Նիկոլ Փաշինյանը հայտարարել էր, որ Հայաստանում ՀԱՊԿ զորավարժություններ այս տարի տեղի չեն ունենա։
«Պաշտպանության նախարարն արդեն իսկ ՀԱՊԿ միավորված շտաբին տեղեկացրել է, որ մենք ՀՀ-ում նման զորավարժություններ անցկանցնելը նպատակահարմար չենք համարում և դրանք, այս տարի՝ համենայնդեպս, չեն կայանա»,-ասել էր Փաշինյանը։
Նշենք, որ ավելի վաղ ՌԴ ՊՆ-ն հայտնել էր, որ ՀԱՊԿ «Անխախտ եղբայրություն 2023» խաղաղապահ զորավարժություններն այս տարի կանցկացվեն Հայաստանում:
Էմմա Չոբանյան
