26.02.2026 | 18:37
Մանկապարտեզների աշխատողների աշխատավարձերը կբարձրանան 15-20 տոկոսով․ Ավինյան
Վրաստանը 2008թ․ Ուկրաինայից անվճար «Բուկ» զենիթահրթիռային համակարգեր չի ստացել․ Վրաստանի ՊՆ
Քաղաքականություն
10.01.2023 | 16:25
Վրաստանը 2008 թվականին Ուկրաինայից անվճար «Բուկ» զենիթահրթիռային համակարգեր չի ստացել, դրանք գնվել են գաղտնի պայմանագրով։ Այս մասին հայտարարել է Վրաստանի Պաշտպանության նախարարությունը, գրում է Գրուզիա օնլայնը։
Երկուշաբթի ուկրաինական «Եվրոպեյսկայա պրավդա»-ն հրապարակել էր Վրաստանում Ուկրաինայի գործերի ժամանակավոր հավատարմատար Անդրեյ Կասյանովի հոդվածը, որում նա նշել է, որ ուկրաինական կողմը խնդրել է վերադարձնել «Բուկ» համալիրները, որոնք Կիևը Թբիլիսիին է հանձնել 2008 թվականին։
Դիվանագետը հայտնել էր, որ Կիևը նաև խնդրել է Թբիլիսիին՝ հանձնել Javelin հակատանկային հրթիռային համակարգերը, որոնք Վրաստանը ստացել է ԱՄՆ-ից։ Կասյանովի խոսքով՝ ԱՄՆ-ը տվել է իր համաձայնությունը և պատրաստ է Վրաստանի համար դրանք ավելի նոր համակարգերով փոխարինել։
«Այն, որ Ուկրաինան Վրաստանին «Բուկ» ՀՕՊ համակարգեր է նվիրաբերել, չի համապատասխանում իրականությանը, պաշտպանության գերատեսչությունը «Բուկ» համակարգերը ստացել է 2007 թվականին՝ բազմամիլիոնանոց գնման գործարքի միջոցով։ Դա իրականացվել է գաղտնի համաձայնագրով, ինչի պատճառով մենք ավելի կոնկրետ մանրամասներ չունենք»,- ասված է Վրաստանի Պաշտպանության նախարարության հաղորդագրությունում։
Գործակալությունը նաև նշել է, որ Վրաստանը նույնպես «տասնյակ միլիոնավոր դոլարներ է վճարել՝ 2017 թվականին ԱՄՆ-ից Javelin հակատանկային համակարգեր ձեռք բերելու համար»։
Պաշտպանության նախարարությունն ընդգծում է, որ Վրաստանը շարունակում է Ուկրաինային տրամադրել հումանիտար և քաղաքական աջակցություն, սակայն ինչ վերաբերում է Կիևին զենքի և երկակի նշանակության տեխնիկայի փոխանցմանը, «Վրաստանի կառավարությունը բազմիցս արտահայտել է հաստատուն դիրքորոշում այս հարցում»։
Տաթև Ֆռանգյան
