ՀՀ-ի ոստիկանը ՌԴ-ի ռազմաբազան պաշտպանեց հայ ժողովրդի՞ց, երբ աշխարհն ամոթանք է տալիս Պուտինին. ՏԵՍԱՆՅՈւԹ

«ՀՀ վարչապետ Նիկոլ Փաշինյանի ամանորյա շնորհավորանքը Ուկրաինայի նախագահ Վլադիմիր Զելենսկիին քաղաքական քայլ չէ։ Ռուս-ուկրաինական պատերազմի 10 ամսում ՀՀ իշխանությունը որևէ խրախուսող խոսք չասաց Ուկրաինային։ Փաշինյանի մաղթանքի տեքստում գնահատական չկար՝ ՌԴ ագրեսո՞ր է, թե՝ ոչ, վտանգվա՞ծ է Ուկրաինայի հայ համայնքը։ Ուկրաինան ՀՀ-ից իրական աջակցության է սպասում, բայց ՀՀ իշխանությունը վճռական չէ՝ ոչ մի աջակցություն ցույց չի տվել»,- Facor TV-ի հարցազրույցում ասում է Ուկրաինայում բնակվող քաղաքական վերլուծաբան Մարատ Հակոբյանը։

Ամանօրյա տոների առթիվ Նիկոլ Փաշինյանը շնորհավորական ուղերձ էր հղել Ուկրաինայի նախագահ Զելենսկիին․ «Լիահույս եմ, որ գալիք տարում խաղաղություն և համերաշխություն կտիրի աշխարհում, և կայունության պայմաններում մեզ կհաջողվի համատեղ քայլերի շնորհիվ նոր թափ հաղորդել փոխադարձ հարգանքի վրա հիմնված հայ-ուկրաինական միջպետական հարաբերությունների հետագա զարգացմանը՝ ի բարօրություն Հայաստանի և Ուկրաինայի ժողովուրդների»,- ասված էր ՀՀ վարչապետի ուղերձում։

Փաշինյանը Ուկրաինայի բարեկամ ժողովրդին նաև հարատև խաղաղություն և կայունություն է մաղթել, իսկ, օրինակ, Ադրբեջանը գեներատորներ է մատակարարել, իհարկե, քննադատվելով ՌԴ ԱԳՆ-ի կողմից, բայց որն ի դեպ, որևէ հետևանք չի ունեցել Բաքվի համար։ Մարատ Հակոբյանն ասում է, որ ՌԴ-ից հավանական վտանգը՝ ուղղված ՀՀ-ին գերագնահատվում է, և իշխանությունները կաղապարված են գործում։ Նախօրեին էլ ՀՀ ոստիկանությունը խափանել է Գյումրիի ռուսական ռազմաբազայի մոտ «Շրջափակում հանուն ապաշրջափակման» խորագրով ակցիայի անցկացումը, որը նախաձեռնել էր ԱԺԲ-ն։ Բերման էին ենթարկվել  հարյուրավոր ակտիվիստներ։ Ոստիկանության ներկայացուցիչները հայտարարեցին, որ ակցիան օրինական չէ։ Իրավապաշտպաններն ապօրինի են գնահատել ոստիկանության գործողությունները, խախտվել է անձանց՝ խաղաղ հավաքների ազատության իրավունքը։ Քաղաքական վերլուծաբանը նշում է․ «Արևմտյան մամուլի համար կարծիք և տեսարան է ստեղծվում, թե հայ ոստիկանները պաշտպանում են ռուսական ռազմաբազան հայ ժողովրդից։ Առանց խորանալու հարցի մեջ, թե որն էր ակցիան կազմակերպած ուժը, ովքեր էին մասնակիցները, արևմտյան ունկնդիրը տեսնում է մի պատկեր, որ հայաստանյան ոստիկանությունը ռուսական ռազմաբազան է պաշտպանում հայ ժողովրդից։ Սա միայն կազմակերպիչների մեղքը չէր, նաև ոստիկանության մեղքն էր։ Սա տարօրինակ է, հատկապես, որ ամբողջ աշխարհը ամոթանք է տալիս ՌԴ-ին, իսկ ՀՀ-ում ոստիկանությունը պաշտպանում է նրանց։ Կարող էր ոստիկանությունն ընդամենը կարգը պաշտպանել և անկարգություններ թույլ չտալ։ Ռուսներն էլ չեն միջամտում Լաչինի միջանցքում ադրբեջանցիների ակցիային։ Հենց ՌԴ-ն է արգելափակել Լաչինի միջանցքը»,- ասաց Մարատ Հակոբյանը։

Հարցազրույցն ամբողջությամբ՝ տեսանյութում։

Ռոբերտ Անանյան