30.06.2026 | 07:57
ԱԱ-2026. Մարոկկոն 11-մետրանոցներով հաղթեց Նիդերլանդներին. ՏԵՍԱՆՅՈՒԹ
Եվս մեկ ադրբեջանցի «էկոակտիվիստ» զինվորական․ ամերիկացի հետաքննող լրագրող Լինդսի Սնելի գրառումը
Քաղաքականություն
09.01.2023 | 16:06
Ամերիկացի հետաքննող լրագրող Լինդսի Սնելը Թվիթերի իր միկրոբլոգում հերթական անգամ անդրադարձել է Լաչինի միջանցքը փակած ադրբեջանցի «էկոակտիվիստներին»։ Սնելը ներկայացրել է ևս մեկ զինվորականի, որը մասնակցում է միջանցքի արգելափակմանը՝ ներկայանալով որպես բնապահպան ակտիվիստ։
«Լաչինի միջանցքը փակած և 120 հազար հայի Լեռնային Ղարաբաղում թակարդը գցած ադրբեջանցի ևս մեկ «էկոակտիվիստ» ։
Ընթանում է Ադրբեջանի կողմից ԼՂ-ի շրջափակման 29-րդ օրը»,-գրել է լրագրողն իր միկրոբլոգում՝ կից ներկայացնելով Լաչինի միջանցքի փակման ակցիային մասնակցող երրիտասարդի լուսանկարը, որը մեկ այլ՝ ավելի վաղ արված լուսանկարում զինվորական համազգեստով է:
Ավելի վաղ ադրբեջանցի իրավապաշտպան Ֆարիդ Իմանովն էլ հայտարարել էր, որ Բաքվի պետական համալսարանի ղեկավարությունը ուսանողներին խոստացել է աչք փակել նրանց բացակայությունների վրա և բավարար գնահատականներ նշանակել, եթե երիտասարդները միանան Լաչինի միջանցքի ցույցերին։
Իրավապաշտպանը հավելել է, որ նման իրավիճակ է ադրբեջանական մի շարք այլ համալսարաններում:
Հիշեցնենք՝ Հայաստանն Արցախին կապող միակ ճանապարհը փակ է դեկտեմբերի 12-ից։ Շուշիի հատվածում միջանցքը փակած ադրբեջանցիներն, ովքեր իրենց անվանում են «անկախ բնապահպաններ», ճանապարհի հենց մեջտեղում վրաններ են տեղադրել՝ Արցախը կտրելով արտաքին աշխարհից ու հումանիտար ճգնաժամ հարուցելով։
Տաթև Ֆռանգյան
