16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
ՌԴ ՊՆ-ն հայտնել է Մակեևկայի ուղղությամբ հարվածի հետևանքով 89 զինծառայողի կորստի մասին
Քաղաքականություն
04.01.2023 | 13:19
Ռուսաստանի Պաշտպանության նախարարությունը հայտնել է, որ Մակեևկայի ուղղությամբ ուկրաինական հարվածի հետևանքով ռուս զինվորականների շրջանում զոհերի թիվը հասել է 89-ի: Մինչ այդ, գերատեսչությունը հաղորդել էր 63 զոհի մասին հունվարի 1-ին մասամբ օկուպացված Դոնեցկի մարզում ժամանակավոր տեղակայման կետի ուղղությամբ HIMARS համակարգերով հասցված հարվածի հետևանքով, գրում է BBC-ի ռուսական ծառայությունը։
ՌԴ ՊՆ-ն տեղեկացրել է, որ զոհվածների թվում է գնդի հրամանատարի տեղակալ, փոխգնդապետ Բաչուրինը։
ՌԴ ԶՈւ գլխավոր ռազմաքաղաքական վարչության պետի առաջին տեղակալ Սերգեյ Սևրյուկովը նշել է, որ հարձակման պատճառն անձնակազմի կողմից բջջային հեռախոսների զանգվածային օգտագործումն է եղել։
«Դա թույլ է տվել հակառակորդին հայտնաբերել և որոշել հրթիռային հարված հասցնելու համար ռազմական անձնակազմի գտնվելու վայրի կոորդինատները»,- ասել է նա։
Մակեևկայի արհեստագործական ուսումնարանի շենքին հարվածը, որտեղ տեղակայված էր ռուս զինվորականների բազան, տեղի է ունեցել Ամանորից անմիջապես հետո։ Նշվում է, որ ուսումնարանի շենքում այդ պահին կարող էր շուրջ 600 մարդ լինել։
Կիրակի Ուկրաինայի Զինված ուժերի ռազմավարական հաղորդակցության վարչությունը հայտնել է, որ Մակեևկայի ուղղությամբ հարվածների ժամանակ 400 մոբիլիզացված ռուսաստանցի է զոհվել, 300-ը՝ վիրավորվել։ Ուկրաինական լրատվամիջոցներն էլ հայտնել են 300 զոհի մասին։
