Իսրայելը հարվածներ է հասցրել Դամասկոսի միջազգային օդանավակայանում տեղակայված իրանամետ ուժերին

Իսրայելը հունվարի 2-ի գիշերը հրթիռային հարված է հասցրել Դամասկոսի միջազգային օդանավակայանին, որի հետևանքով զոհվել է չորս մարդ, այդ թվում՝ երկու սիրիացի զինվոր, France 24-ի փոխանցմամվ՝ հայտնում է Մարդու իրավունքների սիրիական դիտորդական կենտրոնը (SOHR):
«Սպանվել է չորս մարտիկ, այդ թվում՝ երկու սիրիացի զինվոր: Հրթիռները հարվածել են նաև Հըզբոլլահի և իրանամետ խմբավորումների դիրքերին օդանավակայանի շենքի ներսում և դրսում, այդ թվում՝ զինամթերքի պահեստին», – ասվում է զեկույցում։
Իր հերթին, ռազմական աղբյուրը սիրիական պետական SANA գործակալությանը հայտնել է, որ Իսրայելը հրթիռակոծել է Դամասկոսի միջազգային օդանավակայանը և դրա շրջակայքը, ինչի հետևանքով երկու սիրիացի զինվոր է զոհվել: Հաղորդվում է, որ օդանավակայանը չի գործում:
Յոթ ամսից էլ քիչ ժամանակում սա իսրայելական երկրորդ հարձակումն է Դամասկոսի օդանավակայանի վրա, որտեղ տեղակայված են իրանամետ զինված խմբավորումներ և լիբանանյան «Հեզբոլլահ» արմատական շարժման մարտիկները։
Ներկայիս հարվածը տեղի է ունենեցել այն բանից հետո, ինչ Իսրայելի բանակի ղեկավարությունը ներկայացրել է 2023 թվականի գործողությունների պլանը:
«Մենք տեսնում ենք, որ Սիրիայում մեր գործողությունները օրինակ են այն բանի, թե ինչպես են շարունակական և համակարգված ռազմական գործողությունները հանգեցնում ազդեցության փոփոխության ողջ տարածաշրջանում: Մենք չենք ընդունի «Հեզբոլլահ 2.0-ի» առկայությունը Սիրիայում»,- ընդգծվում է ուղերձում։

Տաթև Ֆռանգյան