Ամեն ինչ գնում է դեպի ռազմի դաշտում Ռուսաստանի պարտություն․ Գերմանիայի փոխկանցլեր

Ուկրաինայի դեմ պատերազմում ամեն ինչ գնում է դեպի մարտի դաշտում Ռուսաստանի պարտություն։ Այս մասին dpa-ին տված հարցազրույցում ասել է Միություն-90/Կանաչների կուսակցությունից Գերմանիայի փոխկանցլեր Ռոբերտ Հաբեկը, որը զբաղեցնում է նաև էկոնոմիկայի և կլիմայի պաշտպանության դաշնային նախարարի պաշտոնը, փոխանցում է DW-ի ռուսական ծառայությունը։

«Ոչ ոք չէր կարող պատկերացնել, որ 2022 թվականն այս կերպ կավարտվի։ Ռուսաստանի նախագահ Վլադիմիր Պուտինն այս պատերազմը տանուլ է տալիս մարտի դաշտում»,- ասել է նա։

Ըստ Ռոբերտ Հաբեկի՝ դա պայմանավորված է նրանով, որ ուկրաինական բանակը զենք է ստանում Եվրոպայից, ՆԱՏՕ-ի երկրներից և ԱՄՆ-ից, և այդ զենքերն օգտագործում է «հմտորեն ու ռազմավարական, իմաստուն և հերոսաբար»։

«Ես կողմ եմ, որ Գերմանիան իր դաշնակիցների հետ միասին աջակցի Ուկրաինային այնպես, որ նա կարողանա հաղթել այս պատերազմում»,- ասել է Հաբեկը։

Դեռևս ռուսական ռազմական ագրեսիայի սկսվելուց առաջ նա հանդես էր գալիս Կիևին զենք մատակարարելու օգտին, հիշեցնում է dpa-ն։

«Իհարկե, կլինեն նոր համակարգեր, հետագա աջակցություն, բայց դրանք պետք է համաձայնեցվեն դաշնակիցների հետ»,- ասել է Գերմանիայի կառավարության ղեկավարի տեղակալը։

Միացյալ Նահանգները նախկինում հաստատել է Կիևին միջին հեռահարության հակաօդային և հակահրթիռային պաշտպանության Patriot ամերիկյան շարժական զենիթահրթիռային համակարգի տրամադրումը: Ուկրաինացի զինվորականները կվերապատրաստվեն դրա հետ աշխատելու համար։

Բեռլինը նաև հայտարարել է Վարշավային երեք Patriot հակաօդային պաշտպանության համակարգերի փոխանցման մասին։

Տաթև Ֆռանգյան