Ուկրաինայում մարտերն այս պահին փակուղում են․ ուկրաինացի պաշտոնյա

Ուկրաինայում մարտերն այս պահին փակուղում են. ո՛չ Ուկրաինան, ո՛չ Ռուսաստանը չեն կարողանում էական բեկումներ մտցնել, կարծում է Ուկրաինայի Գլխավոր շտաբի գլխավոր հետախուզական վարչության պետ Կիրիլ Բուդանովը։ «Իրավիճակը պարզապես սառել է,- ասել է Բուդանովը  BBC-ին:– Շարժ չկա»:

Այն բանից հետո, երբ ուկրաինական զինված ուժերը նոյեմբերին ազատագրեցին Խերսոնը, հիմնական մարտերը ընթանում են Դոնեցկի մարզի Բախմուտի շրջանում։ Ռազմաճակատի մնացած հատվածում ռուսական զորքերը հիմնականում պաշտպանական դիրքերում են, և ձմռան սկիզբը և հարձակողական զենքի բացակայությունը ստիպել են ուկրաինական ուժերին նվազեցնել ցամաքային գործողությունների ինտենսիվությունը շփման գծի երկայնքով, որը ձգվում է մոտ 1000 կմ:

Բուդանովի խոսքով, Ռուսաստանն այժմ «լիակատար փակուղում է՝ կրելով չափազանց մեծ կորուստներ», և Կրեմլն արդեն որոշել է հայտարարել մոբիլիզացիայի հերթական ալիքի մասին։ Այնուամենայնիվ, ըստ պաշտոնյայի՝ ուկրաինական բանակը շատ ոլորտներում դեռևս չունի առաջ շարժվելու ռեսուրսներ:

«Մենք չենք կարող նրանց բոլոր ուղղություններով լիակատար ծավալներով պարտության մատնել։ Բայց նրանք նույնպես չեն կարողանում։ Մենք մեծ անհամբերությամբ սպասում ենք զենքի նոր մատակարարումներին, ինչպես նաև սպառազինությունների ավելի առաջադեմ տեսակների ժամանելուն», – ասել է Ուկրաինայի Գլխավոր շտաբի հետախուզության գլխավոր վարչության պետ Կիրիլ Բուդանովը։
Այս ամսվա սկզբին Ուկրաինայի զինված ուժերի գլխավոր հրամանատար, գեներալ Վալերի Զալուժնին ասել էր, որ պատերազմում հաջողության հասնելու համար անհրաժեշտ է զգալիորեն ավելի շատ զենք, քան ներկայումս տրամադրում են Ուկրաինայի գործընկերները։

Տաթև Ֆռանգյան