Պատրաստվե՛ք պայքարին՝ դիմակայելու թուրք-ռուսական ահռելի ճնշմանը, որ ՀՀ անկախությունը պաշտպանենք․ Արամ Սարգսյան. ՏԵՍԱՆՅՈՒԹ

Factor TV–ի հարցազրույցը «Հանրապետություն» կուսակցության ղեկավար Արամ Սարգսյանի հետ

-Որպես հասարակություն և պետություն՝ արդյո՞ք 2022 թվականին հաջողվեց դիմակայել մարտահրավերներին ու արտաքին ճնշումներին, թե՞ ձախողվեցինք:

-Ես այն կարծիքին եմ, որ մենք հրաշք ժողովուրդ ենք։ Մենք ինքներս էլ չենք զգում, թե ինչ փորձությունների միջով ենք անցել, ինչ ուժերի ենք հաղթահարել, և ոչ միայն հաղթահարել ենք, այլ նաև սկսել ենք դիմակայել։ Մենք դիմակայել ենք 90 միլիոնանոց Թուրքիային, 10 միլիոնանոց Ադրբեջանին, ինչպես նաև Ռուսաստանին, որը, իբր, մեր բարեկամն է, բայց իր ամբողջ ուժով ու պոտենցիալով աշխատում է թուրք-ադրբեջանական համաձայնության կողմից։ Մենք կարողացանք գնահատել մեր անկախությունն ու չզիջել։ Քննադատելով այսօրվա իշխանությանը հազար ու մի խնդրով՝ պիտի ասեմ՝ ապրեն իրենք։ Եթե նախկինները լինեին, մեկն ասելու էր՝ եկեք քիչը տանք, որ շատը պահենք, մյուսն ասելու էր՝ միայն Ռուսաստանի հետ է Ղարաբաղի հարցի լուծումը, այլընտրանք չկա, երրորդն ասելու էր՝ հայության փրկությունը Միութենական պետությունն է։ Մենք լուրջ փորձություններով ենք անցել։

-Իշխանությունների հասցեին դրական գնահատական հնչեցրիք, իսկ տարածքային կորուստները, մարդկային զոհերը․․․

-Այն մարտահրավերները, որ կային մեր դեմ, անհնար էր հաղթահարել առանց տարածքային կորուստների ու զոհերի։ Դիմադրությունը հեշտ չի լինելու, զոհեր են պահանջվելու, բայց մենք զինվում ենք, չէ՞, մենք Ռուսաստանից դուրս զենք ենք առնում։ Երկու անգամ ՄԱԿ-ի Անվտանգության խորհրդի նիստում Ղարաբաղի հարց է բարձրաձայնվել, կարգավիճակի մասին է խոսվել, «անջատում՝ հանուն փրկության» ծրագրից է խոսվել։ Մենք լուրջ խնդիրներ ենք դրել թե՛ Ռուսաստանի, թե՛ Ադրբեջանի, թե՛ Թուրքիայի առաջ․․․ Ալիևը լուրջ խնդիրներ ունի․․․

-Չի՞ մարսելու հայկական տարածքների գրավումը։

-Իհարկե՝ չի մարսելու, և դա ակնհայտ երևում է։

Հարցազրույցն ամբողջությամբ՝ տեսանյութում։

Ռոբերտ Անանյան