11.04.2026 | 10:28
Իշխանությունը քննարկում է ՀՖՖ նախագահի փոփոխության հարցը․ ովքեր են թեկնածուները
Ադրբեջանից հայտարարել են 2023թ․ Հայաստանի դեմ նոր դատական հայցեր ներկայացնելու ծրագրերի մասին
Քաղաքականություն
28.12.2022 | 14:35
Ադրբեջանի իշխանությունների կողմից ղեկավարվող Միջազգային հարաբերությունների վերլուծության կենտրոնի ղեկավար Ֆարիդ Շաֆիևը մամուլի ասուլիսում հայտարարել է, որ Բաքուն շարունակելու է Հայաստանի դեմ միջազգային ատյաններ դատական հայցեր ներկայացնել։
Նա նշել է, որ Ադրբեջանը Հայաստանի դեմ հայցեր ունի երկու դատարաններում՝ Արդարադատության միջազգային դատարանում և Մարդու իրավունքների եվրոպական դատարանում, որոնք զբաղվում են մարդու իրավունքների հարցերով։
«Այլ հարցեր օրակարգում չկան։ Փոխհատուցման հարցը շատ բարդ է։ Մենք բարձրացնելու ենք այդ հարցերն առանձին ազգային դատարաններում։ Օրինակ՝ կա շվեյցարական ընկերություն, որը Ղարաբաղում անօրինական գործունեություն է իրականացնում և եկամուտ ստանում։ Մենք հայց ենք նախապատրաստում շվեյցարական դատարանում»,- ասել է Շաֆիևը։
Հիշեցնենք, որ նախօրեին էլ Ադրբեջանի ԱԳ նախարար Ջեյհուն Բայրամովն էր խոսել Հայաստանի դեմ ներկայացված հայցերի մասին։
«Այդ գործընթացներն ունեն իրենց առանձնահատկությունները։ 2023 թվականի սկզբից մենք նոր մեղադրանքներ կներկայացնենք Հայաստանի դեմ՝ Ադրբեջանի շրջակա միջավայրին և բնությանը վնաս հասցնելու, ինչպես նաև էներգետիկ ու բնական ռեսուրսների անօրինական շահագործման համար»,- ասել էր Բայրամովը։
Հավելենք, որ Արցախյան 44-օրյա պատերազմի ավարտից հետո Ադրբեջանի իշխանությունները պարբերաբար հանդես են գալիս Հայաստանի դեմ նոր դատական հայցերի (հատկապես՝ տնտեսությանն առնչող) և փոխհատուցման պահանջի մասին հայտարարություններով, սակայն գործնականում այս առումով տեղաշարժ չկա։
Էմմա Չոբանյան
