Քաղաքականություն
27.12.2022 | 17:56
Բաքվի համար Լեռնային Ղարաբաղի կարգավիճակի հարցն ապագա սերունդներին թողնելու ՌԴ առաջարկն անընդունելի է։ Այսօր նման հայտարարությամբ է հանդես եկել Ադրբեջանի ԱԳ նախարար Ջեյհուն Բայրամովը։
«Գաղտնիք չէ, որ ռուսական կողմն առաջարկել է Ղարաբաղի կարգավիճակի հետ կապված հարցը թողնել ապագա սերունդներին։ Բաքուն իր դիրքորոշումն այդ հարցում արդեն արտահայտել է»,- ասել է Բայրամովը։
Ի դեպ, Ադրբեջանը, որը մշտապես հայտարարում է, որ Արցախի կարգավիճակի հարց գոյություն չունի, ստացվում է՝ ընդունում է, որ հարցը, այնուամենայնիվ, քննարկում է։
«Մենք պետք է հիմնվենք մեր օրակարգի, մեր առաջարկների վրա։ Առաջին իսկ օրից հայտարարել ենք, որ այս առաջարկն անընդունելի է։ Մենք բանակցում ենք հիմնարար սկզբունքների շուրջ։ Ադրբեջանը քայլեր է ձեռնարկում միայն իր ազգային շահերի շրջանակում»,- ասել է Բայրամովը։
Հավելենք, որ սեպտեմբերի 13-ին Ադրբեջանի կողմից ՀՀ ներխուժումից առաջ ռուսական այս առաջարկը կողմերին ներկայացրել էր ՌԴ ԱԳ նախարարի հատուկ ներկայացուցիչ Իգոր Խովաևը։ Պաշտոնական Մոսկվան տարբեր հայտարարություններով նշել է, թե, իբր, Հայաստանն է այն մերժել։
Պաշտոնական Երևանն էլ հայտարարել է, որ ՀՀ-ն ընդունել է ռուսական առաջարկն ու Մոսկվայից ակնկալում է սեփական առաջարկներից չհրաժարում։
Ադրբեջանը պաշտոնապես առաջին անգամ է հայտարարում, որն հենց ինքն է մերժել ՌԴ առաջարկները։
Էմմա Չոբանյան
