Լավրովը պնդում է, որ ԱՄՆ-ն ցանկանում է ֆիզիկապես ոչնչացնել Պուտինին

Ռուսական ՏԱՍՍ պետական լրատվական գործակալությունը հրապարակել է հատվածներ ՌԴ ԱԳ նախարար Սերգեյ Լավրովի հետ հարցազրույցից: Դրանցից մեկում ռուս նախարարը պնդել է, թե Վաշինգտոնում ինչ-որ մեկը Ռուսաստանի նախագահին ֆիզիկապես ոչնչացնելու ծրագրեր է մշակում։

«Ամենից հեռուն Վաշինգտոնն է գնացել․ այնտեղ Պենտագոնի որոշ «անանուն պաշտոնյաներ» իրականում սպառնացել են «գլխատող հարված» հասցնել Կրեմլին, իրականում խոսքը ռուսական պետության ղեկավարին ֆիզիկապես ոչնչացնելու սպառնալիքի մասին է։ Եթե ինչ-որ մեկի կողմից նման գաղափարներ իրականում փայփայվում են, ապա այդ ոմն մեկը պետք է լավ մտածի նման ծրագրերի հնարավոր հետևանքների մասին»,- Լավրովի խոսքերն է մեջբերում ՏԱՍՍ-ը։

Լավրովը չի նշում այս տեղեկատվության աղբյուրը, սակայն նրա մեջբերած մանրամասները համընկնում են սեպտեմբերի 29-ին Newsweek-ում հրապարակված հոդվածի բովանդակության հետ, որի հրապարակումից անմիջապես հետո ԱՄՆ-ում Ռուսաստանի դեսպանատունը վրդովմունք էր հայտնել։ BBC-ի ռուսական ծառայությունը նկատում է, որ հոդվածը լույս է տեսել այն ժամանակ, երբ Կրեմլը խոսում էր միջուկային զենք կիրառելու սպառնալիքի մասին:

Հոդվածագիրը հարց էր բարձրացրել, թե ինչպես կվարվի ԱՄՆ-ը, եթե Ռուսաստանը հետամուտ լինի այդ սպառնալիքներին։ Newsweek-ի զրուցակիցներն ընդգծել էին, որ նույնիսկ այդ դեպքում ԱՄՆ-ն, ամենայն հավանականությամբ, չի պատասխանի միջուկային զենքով, քանի դեռ իր տարածքը չի ենթարկվել հարձակման։ Միաժամանակ, այս համատեքստում հնարավոր էին համարել ոչ միջուկային այլընտրանքների կիրառումը, ներառյալ՝ «գլխատող հարված Պուտինին Կրեմլի սրտում սպանելու համար»:

Տաթև Ֆռանգյան