Լաչինի միջանցքի հետ կապված իրավիճակը բարդացնում է Բաքվի և Երևանի միջև խաղաղության բանակցությունները․ՌԴ ԱԳՆ

Լաչինի միջանցքի շուրջ իրավիճակի սրումը բարդացնում է Հայաստանի ու Ադրբեջանի միջև խաղաղության պայմանագրի վրա աշխատանքը։ Այս մասին ՏԱՍՍ-ի հետ զրույցում հայտարարել է ՌԴ ԱԳ փոխնախարար Միխայիլ Գալուզինը։

«Անկասկած, Լաչինի միջանցքի շուրջ ներկայիս սրման նման միջադեպերը չեն կարող չբարդացնել բանակցությունների ֆոնը, այդ թվում՝ խաղաղության պայմանագրի շուրջ: Ռուսական կողմը գործուն ջանքեր է գործադրում տեղում իրավիճակը կարգավորելու համար: Հուսով ենք շուտափույթ  համատեղ աշխատանքի վերսկսմանը հայ-ադրբեջանական կարգավորման բոլոր ուղղություններով»,-ասել է փոխնախարարը։

Նա նշել է, որ այս դեպքում փաստաթղթի համաձայնեցման ժամկետն այնքան էլ էական չէ։ «Գլխավորն այն է, որ Բաքուն ու Երևանը կարողանան հասնել փոխընդունելի որոշման, որը կերաշխավորի կայուն և արդար խաղաղություն տարածաշրջանում»,- հավելել է դիվանագետը: Նրա խոսքով՝ ռուսական կողմը պատրաստ է նպաստել բանակցային գործընթացին այնպես, ինչպես ամրագրված է հոկտեմբերի 31-ին Սոչիի գագաթնաժողովի արդյունքներով Ռուսաստանի, Ադրբեջանի և Հայաստանի ղեկավարների եռակողմ հայտարարության մեջ։

Հավելենք, որ Ադրբեջանի իշխանությունները, խախտելով 2020 թ-ի նոյեմբերի 9-ի եռակողմ հայտարարությունը արդեն 15-րդ օրն է շարունակում են փակ պահել Արցախը Հայաստանին կապող միակ ճանապարհը՝ Լաչինի միջանցքը։ Ռուսական խաղաղապահ զորախումբը  չի կատարում հայտարարությամբ իր պարտավորությունը՝ ապահովել միջանցքի անվտանգությունն ու դրանով անխափան երթևեկությունը։

Էմմա Չոբանյան