13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Սերբիայի նախագահ Վուչիչը Բաքվում է․ Ալիևի հետ զարգացնում են ռազմարդյունաբերությունն ու քննարկում գազի մատակարարումները
Քաղաքականություն
21.12.2022 | 18:36
Սերբիայի նախագահ Ալեքսանդր Վուչիչն աշխատանքային այցով Ադրբեջանում է։ Նշենք, որ վերջին շրջանում բավական ակտիվացել են Բաքվի ու Բելգրադի շփումները․ նոյեմբերի 23-ին էլ Ալիևն էր մեկնել Սերբիա, այցի ընթացքում երկու երկրների միջև ստորագրվել էին մի շարք փաստաթղթեր, այդ թվում՝ ռազմավարական գործընկերությանը վերաբերող։
Այսօր արդեն տեղի են ունեցել Ալիևի և Վուչիչի առանձին բանակցությունները, որից հետո երկու նախագահները հանդես են եկել հայտարարություններով։
Ադրբեջանի նախագահ Իլհամ Ալիևը, մասնավորապես, հայտարարել է, որ Բաքուն և Բելգրադը տրանսպորտի և նյութատեխնիկական ապահովման, պաշտպանական արդյունաբերության ոլորտում համագործակցության մեծ ներուժ ունեն։
«Տրանսպորտի և լոգիստիկայի ոլորտում մեծ ներուժ կա։ Հատկապես, եթե հաշվի առնենք, որ միջազգային տրանսպորտային միջանցքներն անցնում են Ադրբեջանի և Սերբիայի տարածքներով, մեր համապատասխան կառույցները պետք է ակտիվ աշխատեն կապի հաստատման ուղղությամբ։ Արդեն կապեր են հաստատվել երկու երկրների համապատասխան կառույցների միջև»,- ասել է Ալիևը։
Նա նաև անդրադարձել է պաշտպանական արդյունաբերության ոլորտում երկու երկրների համագործակցության հարցին։
«Սերբիա կատարած այցի ժամանակ մենք համապատասխան հանձնարարականներ ենք տվել պաշտպանական արդյունաբերության ոլորտի ներկայացուցիչներին։ Երկու երկրներն էլ այս ոլորտում ներուժ ունեն, և ակնկալվում է, որ գործնական քայլեր կձեռնարկվեն՝ այդ ներուժը միավորելու համար»,- ասել է Ադրբեջանի նախագահը։
Ի դեպ, Վուչիչն այսօր հանդիպել է նաև Ադրբեջանի պաշտպանական արդյունաբերության նախարար Մադաթ Գուլիևի հետ։ Նշվում է, որ կողմերը քննարկել են Բաքվի և Բելգրադի միջև պաշտպանական արդյունաբերության ոլորտում համագործակցության հարցեր։
Ավելի վաղ էլ Վուչիչը հայտնել էր, որ Ալիևի հետ քննարկելու է գազի, էլեկտրաէներգիայի մատակարարումներին ու զենքին վերաբերող հարցերը։
«Մենք բանակցություններ ենք ակնկալում էներգետիկ հարցերի շուրջ՝ էլեկտրաէներգիայից մինչև գազ։ Կարևոր բանակցություններ են սպասվում ինչպես ռազմական արդյունաբերության, այնպես էլ գիտելիքի և տեխնոլոգիաների փոխանցման հարցերի շուրջ»,- ասել էր Վուչիչը սերբական Pink հեռուստաալիքին տված հարցազրույցում։
Էմմա Չոբանյան
