16.09.2026 | 10:44
Եվրահանձնաժողովն իր զեկույցում անդրադարձել է Հայաստանին․ կլինի՞ ՀՀ-ն 2027թ-ի՝ ԵՄ-ի առաջնահերթություններում
Զելենսկին մեկնում է Վաշինգտոն. սա նրա առաջին արտասահմանյան այցն է պատերազմի սկզբից ի վեր
Քաղաքականություն
21.12.2022 | 11:45
Ուկրաինայի նախագահ Վլադիմիր Զելենսկին մեկնել է Վաշինգտոն, որտեղ ելույթ կունենա Կոնգրեսում և կհանդիպի ԱՄՆ նախագահ Ջո Բայդենի հետ, գրում է BBC-ի ռուսական ծառայությունը։
«Ջո Բայդենի հետ կքննարկենք Ուկրաինայի և Միացյալ Նահանգների համագործակցությունը: Ես նաև ելույթ կունենամ Կոնգրեսում և մի շարք երկկողմ հանդիպումներ կունենամ»,- գրել է Զելենսկին Twitter-ում։
Փետրվարի 24-ից ի վեր սա Ուկրաինայի նախագահի առաջին արտերկրյա այցն է։ Նա ողջ պատերազմի ընթացքում միայն Կիևում է հանդիպել այլ երկրների բարձրաստիճան պաշտոնյաների կամ զրուցել նրանց հետ տեսակապով։
ԱՄՆ Կոնգրեսի Ներկայացուցիչների պալատի խոսնակ Նենսի Փելոսին նամակ է հղել պատգամավորներին, որում խնդրել է, որ չորեքշաբթի օրն անպայման ներկա գտնվեն պալատի նիստին։ CNN-ը բացատրում է, որ Սուրբ Ծննդյան արձակուրդից առաջ շատ կոնգրեսականներ կարող են բաց թողնել հանդիպումները, իսկ դահլիճը կարող է կիսադատարկ լինել։
Գերմանական Կիլի Համաշխարհային տնտեսության ինստիտուտի հաշվարկներով ԱՄՆ-ն այս տարի 18,5 միլիարդ դոլարի ռազմական օգնություն է տրամադրել Ուկրաինային, ինչը ավելի շատ է, քան Ուկրաինայի մյուս դաշնակիցների օգնությունը միասին վերցրած: ԱՄՆ-ի հաջորդ տարվա բյուջեն ներառում է 23,5 միլիարդ դոլարի ռազմական օգնություն Ուկրաինային։
Տաթև Ֆռանգյան
