07.08.2026 | 11:45
ԵԱՏՄ անդամ պետությունների փոխգործակցությունը երրորդ գործընկերների հետ չպետք է ընկալվի որպես զրոյական գումարով խաղ․ վարչապետ
Հռոմի պապը մտահոգություն է հայտնել Լեռնային Ղարաբաղում հումանիտար իրավիճակի կապակցությամբ
18.12.2022 | 17:07
Հռոմի Ֆրանցիսկոս պապը հայտարարել է, որ մտահոգված է Հարավային Կովկասում Լաչինի միջանցքում ստեղծված իրավիճակով և կոչ է արել բոլոր կողմերին գտնել «խաղաղ լուծումներ՝ ի բարօրություն ժողովրդի»: Այս մասին հայտնում է Vatican News-ը։
«Ես մտահոգված եմ այն մարդկանց ծանր հումանիտար պայմաններով, որոնք ձմեռային սեզոնի ընթացքում հետագա վատթարացման վտանգի տակ են»,- ասել է նա:
Հռոմի Քահանայապետի հնչեցված այս մտահոգությանն է անդրադարձել Սուրբ Աթոռի պաշտոնաթերթ հանդիսացող «Վատիկան Նյուզը»՝ տպագրելով հոդվածներ Ադրբեջանի կողմից թշնամական գործողությունների արդյունքում հումանիտար ճգնաժամի եզրին հասցրած Լեռնային Ղարաբաղում ապրող հայ բնակչության իրավիճակին, այդ թվում՝ 30 հազար երեխաներին, ովքեր ներկայումս մեկուսացված են և զրկված են սննդից, դեղորայքից և առաջին անհրաժեշտության պարագաներից, անդրադառնալով նաև միջազգային հանրության արձագանքներին:
Հիշեցնենք, որ դեկտեմբերի 12-ին՝ ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ համաձայնագրի դրույթները, բնապահպանական պատճառաբանություններով փակել է Արցախն աշխարհին կապող միակ ճանապարհը` ոտնահարելով քաղաքացիական բնակչության կենսական շահերն ու իրավունքները:
Նշենք նաև, որ Ադրբեջանը դեկտեմբերի 13-ից դադարեցրել էր Արցախի Հանրապետության գազամատակարարումը, դեկտեմբերի 16-ին գազամատակարարումը վերականգնվել է։
