Հաղորդաշարեր
17.12.2022 | 19:00«Իրականում պատերազմը չի դադարել, և այն, ինչ կատարվում է Արցախում` հիբրիդային պատերազմ է: Այն բացահայտեց հետաքրքիր մի իրականություն` փոխանակ մենք թիկունք կանգնենք արցախցիներին, իրենք են մեզ ոգևորում: Ասում են`հանգիստ եղեք, մենք պատրաստ ենք սրան, մենք պինդ ենք, դուք պինդ եղեք»,- Factor TV-ի հետ զրույցում նշում է Երևանի պետական տիկնիկային թատրոնի գեղարվեստական ղեկավար Ռուբեն Բաբայանը` հավելելով, որ մենք դեռ 90-ականներից գիտենք` ինչ է նշանակում գազից զրկվել, լույս չունենալ, սոված մնալ ու իրար թիկունք կանգնել:
Նրա խոսքով` մեր արձագանքը տեղի ունեցողին չպետք է լինի այդրոպեական, մենք պետք է ունենանք խորը գնացող նպատակներ. «Մենք բաց ենք թողնում մեզ համար ամենակարևոր խաղաքարտը` քաղաքակրթականը: Մենք պետք է աշխարհին ցույց տանք, որ քաղաքակրթական այն ընտրությունը, որն արել են Հայաստանի և Արցախի հայերը, չի համապատասխանում այն ընտրության հետ, որն արել են ադրբեջանցիները: Արդյոք կկարողանա՞նք հրաժարվել այն մտայնությունից, թե, իբր, այնքան թույլ ենք, որ պահանջներ ներկայացնելու իրավունք չունենք և պարզապես պետք է գտնենք ուժեղ հովանավոր, որը մեր փոխարեն կլուծի մեր խնդիրները»,-ասում է մեր զրուցակիցը:
Ռուբեն Բաբայանը խոսում է դաշնակցի հարցում կողմնորոշվելու կարևորության մասին և այն մասին, թե ինչ ենք ստանում մենք` լինելով Ռուսաստանի դաշնակիցը. «Երբ մենք խոսում ենք Ադրբեջանի ագրեսիայի մասին, մեզ ասում են` իսկ ինչու՞ չեք խոսում այն մասին, թե ինչ է անում Ռուսաստանն Ուկրաինայում: Չի´կարող լինել «տարածաշրջանային բարոյականություն»: Մենք եվրոպական երկրներին հաճախ մեղադրում ենք երկակի ստանդարտներ կիրառելու համար, իսկ մենք արդյոք մի՞ ստանդարտ ունենք»: Նրա համոզմամբ` Հայաստանն ինքը պետք է որոշի, թե որն է իր տեղը աշխարհում, իսկ եթե դա չի անում, իրավունք չունի դժգոհելու իր հանդեպ վերաբերմունքից:
